Ilisimatusarneq

Qaleralinnik uuttortaaneq. Uummannaq Ass: Pinngortitaleriffik
Qaleralinnik uuttortaaneq. Uummannaq Ass: Pinngortitaleriffik
Pinngortitaleriffiup angallataani misissuiffimmi R/V Sanna-imi qaleralinnik uuttortaanerit Ass: Pinngortitaleriffik
Pinngortitaleriffiup angallataani misissuiffimmi R/V Sanna-mi qaleralinnik uuttortaanerit Ass: Pinngortitaleriffik

Misissuinerit

Pinngortitaleriffik 1985-miilli Kitaata avannaani kangerlunni ningittakkat atorlugit ukiukkaartumik misissuinerit ingerlattarsimavaat. Ullumikkut Pinngortitaleriffik Kitaani Tunumilu qaleraleqatigiiaat pillugit misissuinerit assigiinngitsut arlallit ingerlappaa.

 

Sinerissap qanittuani misissuinerit

Siunissami aalisarnerup qanoq ikkumaarnissaa misissorniarlugu Pinngortitaleriffiup qassutit atorlugit misissuinerit aallartissimavai, tassani qassutit assigiinngitsunik nigartussusillit atorneqarlutik. Qassutit atorlugit misissuinikkut takuneqarsinnaalerpoq ukioqatigiiaanik aalisarneqarsinnaalersussanik takkuttussaqarnersoq, ukioqatigiillu ataasiakkaat ineriartorneri malinnaavigineqarsinnaalerlutik. Misissueritaatsip tamatuma maanna Diskobugtemi ningittakkanik misissuinerit taarsersimavai.

Ukiut tamaasa julip qiteqqunneraniit augustip naanissaanut Ilulissat Uummannallu eqqaanni sinerissap qanittuani qaleraleqatigiit misissorneqartarput. Qalerallit pisarineqartut uuttortarneqartarput nalunaaqutannguamillu normulimmik sulussugutaata tunorliup ataatungaanut ikkussivigineqartarlutik. Pisaqarfik, ulloq, aalisakkap takissusaa nalunaaquttallu normua allanneqartarput, aalisagarlu avalatseqqinneqartarluni. Aalisakkat tamarluinnangajammik uumallutik nalunaaqutserneqarnertik anigortarpaat. Aalisakkat pisarineqartut ilaat aamma suiaassusersineqartarput, kinguaasiutaasa inerisimassusaat missingerneqqartarluni utoqqaasusersinissaannullu siunnaajarneqartarlutik.

 

Sinerissap avataani misissuinerit

Japanimiut umiarsuaata misissuutip Shinkai Marup piffissami 1987-1995-imi Tunumi Kitaanilu qaleraleqatigiiaat misissorpaat. Taamatut ukiumoortumik misissuinerit 1997-imi Pinngortitaleriffiup kilisaataanit R/V Pâmiut-nit aallarteqqinneqarput. Misissuinerit katillugit sap. ak. 5 miss. sivisussuseqartarput qalorsuillu atorlugit Davisstrædemi Danmarksstrædemilu 400 meterimiit 1.500 meterinut itissusilinni ingerlasarlutik. Ukiuni kingullerni Pinngortitaleriffik aamma qaleralinnik umiarsuarmi nalunaaqutsersuisalersimavoq.

Qalorsuit atorlugit raajanik misissuinermi qaleraleeqqat ataatsimik ukiullit pisarineqartut amerlassusaat atorneqartarpoq, ukioqatigiinnik pitsaasunik takkuttoqassamaarnersoq aalisakkanillu kinguaassiorsinnaasunik ukioqatigiinnik pitsaasunik pinngortitsisinnaasunik peqarnersoq nalilerniarlugu.

Nutartigaq 10.12.2012