Siunnersuineq

Qalerallit ikaani panersertut Ass: Kaj Sünksen
Qalerallit ikaani panersertut Ass: Kaj Sünksen

Kalaalit Nunaata kitaani sinerissap avataani qanittuanilu qalerallit pillugit siunnersuinerit ilisimatusarnikkut siunnersoqatigiinnit nunat tamat akornanneersunit, NAFO-mit NAFO (Northwest Atlantic Fisheries Organization) suliarineqartarpoq, Tunumilu qaleraleqarfiit pillugit siunnersuinerit ICES ICES (International Council for the Exploration of the Sea) aqqutigalugu ingerlasarluni. Kalaallit Nunaat siunnersuisoqatigiinnut taakkununnga marluusunut ilaasortaavoq.

Kalaallit Nunaata aalisaqatigiivi raajaqatigiivilu pillugit siunnersuinerit ingerlanneqartarput periutsit nunat tamat akornannit akuerisaasut atorlugit. Pissutsit tamarmik eqqortuusuuppata aalisagaqatigiiaat ineriartorneri naatsorsorneqarsinnaassagaluarput paasissutissat aalisarnermeersut, misissuinerneersullu katinnerisigut. Kitaanili sinerissap qanittuani avataanilu qaleraleqarfinni aalisarnerit pillugit paasissutissat taamatut naatsorsuinissamut amigarput. 

Sinerissap avataani misissuinermi ukiut amerlassusaat amigarput, pisassiissutissanullu matematikkikkut ilisserusiornissamut paasissutissat (misissuilluni aalisarnermi pisat, aningaasarsiorluni aalisarnermi pissarissuseq pisallu annertussusaat) assigiiaarpallaarlutik. Sinerissap qanittuani aalisarnerup qanoq annertutiginera pillugu paasissutissat amigaataapput; ass. oqummersat qassutilluunniit qassit atorneqarsimanersut, qanorlu sivisutigisumik ningisimasimanersut.

Taamaammat ilisimatuussutsikkut siunnersuinermik suliaqaraanni paasissutissat pioreersut qanoq ineriartorfiunersut: Pinngortitaleriffiup nammineq misissuinerini pisat ikiliartorpat amerliartorpalluunniit (oqummersamut kiilut imalt. qalusinermi kiilut)? Aalisakkat inuutissarsiortunit Pinngortitaleriffimmillu pisarineqartut utoqqaassusaat (takissusaat) allanngoriartorpa? Inuutissarsiornermi pissarissutsit (nal. Akunneranut, oqummersamut qassutilluunniit ataatsip pisai) allanngorpat? Ukioqatigiiaat nutaat takkussornerat ajunngila? Il. il.

Kalaallit Nunaanni qalerallit pillugit siunnersuinerit kingulliit aajuku

Nutartigaq 20.10.2015