Aalisagaqatigiiaanut immami ikerinnaasiortunut 2018-imi pisassiissutigineqarsinnaasutut innersuussutit appariaateqarput

13.10.17

Biologit Atlantikup avannaata kangiani avaleraasartoortassiissutigineqarsinnaasut, ammassassuartassiissutigineqarsinnaasut saarullernartassiissutigineqarsinnaasullu pillugit 2018-imut siunnersuinerat siorna pisassiissutigineqarsinnaasutut innersuussutaannit appariaateqarput.

ICES´imit 2018-imut 550.948 tonsit sippornagit avaleraasartoortassiissutigineqarsinnaasutut innersuussutigi­neqarput, tassa ukiormanna 2017-imut pisassiissutigineqarsinnaasutut innersuussutigineqartunit 36%-imik appariaateqarput. Nunat assigiinngitsut 20-nit amerlanerusut avaleraasartoorniaqataasarput, 2017-imilu pisat tamakkerlutik 1.178.850 tonsiusimapput. Nunatsinniit aalisariutit avaleraasar­toorniarnermi 2011-miit peqataasalerput.

ICES´imit 2017-imut 546.472 tonsit sinnernagit ammassassuartassiissutigineqarsinnaasutut innersuus­su­tigi­ne­qarput, tassa 2017-imut innersuussutigineqartunit 15%-imik appaasoqarluni. Nunat assigiinngitsut 11-nit amerlanerusut ammassassuarniaqataasarput, 2017-imilu tamakkerlutik pisarisimasaat 805.142 tonsit missaanniissimapput. Aalisariutit Nunatsinneersut ammassassuarnermi 2007-imiit peqataasalerput.

ICES´imit 2017-imut 1.387.872 tonsit sinnernagit saarullernartassiissutigineqarsinnaasutut innersuussutigineqarput, tassa 2017-imut innersuussutigineqartunit 3%-imik qaffa­riaa­te­qartitsisoqarluni. Kalaallit aalisariutaataat nunat tamalaat imartaanni Savalimmiullu imartaanni nunat sineriallit isumaqatigiissuteqarfiginerisigut saarullernarniartarput. Kalaallit aalisariutaat amerlagisassaanngitsunik Kalaallit Nunaata imartaani pisaqartarput.

Irmingerip Imartaani suluppaakkanik ikerinnaasiortunik aalisartarneq nalinginaa­sumik suluppaagaqatigiinnut immap ikerinnaasiortunut aammalu itinerusumiittartunut sammitinneqarneruvoq. Tappavani suluppaagar­tarineqartartut 1990-ikkut qiteqqunneranniit 240.000 tonsit pallimalera­luarpaat, peqassutsilli pisassiissutaasartullu appariaateqarnerat ilutigalugu 30.000 tonsinut appariarsimallutik. Irmingerip Imartaani suluppaagaqassutsinut tunngatillugu biologit 2017-imut aamma 2018-imut siunnersuineranni toqqaannartumik aalisartoqannginnissaa ICES´imit innersuus­sutigineqarpoq. Suluppaagaq arriitsuarannguaannarmik alliartortartuummat peqassutsip ukiuni aggersuni pitsanngoriaateqangaarnissaa naatsorsuutigine­qanngilaq.

Tunumi, Islandimi Jan Mayenimilu 2017-imi 2018-imilu ammassanniartoqanngikkallarnissaanik ICES innersuussuteqarpoq. Siunnersuineq oktobarip qiteqqunnerani nutarterneqassaaq siunnersuinerlu naammassippat januaarimi saqqummiunneqareeruni februaarip aallartinnerani nutarterneqaqqissalluni. 2016-2017-imilu ammassanniarnermi pisassiissutigineqarsinnaasutut innersuussutigineqartut 299.000 tonsiusimapput.

Itinerusumik paasisaqarusunnermi saaffigisassaq:
Aalisakkanut Qalerualinnullu Immikkoortortaqarfimmi pisortaq, Helle Siegstad, oqarasuaat 361200 imal. email hesi@natur.gl

<- Uterit

Assi: Pinngortitaleriffik