Aalisarnermut ingeniør – ilinniarneqarsinnaalersussaq nutaaq piariingajalerpoq

12.06.18

Danmarkimi DTU Aqua-p Namminersornerusunilu ilinniartitaanernik suliaqartut Nunatsinni aalisarnermut sammititamik ilinniarneqarsinnaalersussamik nutaamik piviusunngortitsiniarlutik qulequtarineqartumut attuumassutilinnik isumattorsaqatigiissitsinerat Pinngortitaleriffimmi qanittukkut ingerlanneqarpoq. Tassa pilersaarutigineqartut naapertorlugit aalisarnermi atortorissaarusersornermi diplomingeniørinngornianik, aamma aalisarnermut ingeniørinngornianik taaneqartartunik, septemberip aallaqqaataa 2019 Sisimiuni Center for Arktisk Teknologi, ARTEK-ip, ataani ilinnialerniartut aallartissinnaanngussapput. Tassani ilinniartut Kalaallit Nunaanneersut Danmarkimeersullu 25-t ukiuni sisamani ilinnialerniarlutik aallartissinnaanngussapput. Ilinniarnerup annertunerpaartaa Nunatsinni ingerlanneqarsinnaassaaq, ilaalu aamma Danmarkimi DTU-mi ingerlanneqartassalluni.

”Ilinniagaq Kalaallit Nunaanniit sivisuumik kissaataasimasoq piviusunngoqqajaalerpoq. Pingaartumik Kalaallit Nunaanni aalisarnermik inuussutissarsiuteqartut suliffissuit ilinniartitaanernik taama ittunik pisariaqartitsisimapput, taamaammat soqutigisaqartut kissaataat pisariaqartitaallu naapertorlugit taakkulu qanimut suleqatigalugit ilinniartitaanerup ilusissaa naniniarsimavarput. Ilinniarneqarsinnaalerumaartoq Namminersorlutik Oqartussat ilinniartitaanernut aammalu aalisarnermut periusissiaat naapertorlugu taakkuninngalu ikorfartueqataasussatut ilusiligaavoq”, DTU Aquami ilinniartitaanernut akisussaasoq uanilu pineqartumi suliami aqutsisuusoq Nina Qvistgaard oqarpoq.

Taanna oqaluttuarpoq ilinniarneqarsinnaalerumaartoq sisamanut immikkoortunut pingaarnerutillugit sammiviligaasoq: tamakkiisumik isiginnilluni uumassusilerineq immallu sananeqaataannut tunngassutillit, aalisarnermi piniutitigut atortorissaarutit aalisakkanik piujuartitsiniarnermik tunngaveqartumik pisarineqartarnissaannik qulakkeerinneqataasussanik sammisaqarnerit, aalisakkanik qalerualinnillu tunisassiornermi ingerlatseriaatsit kiisalu aalisarnermi aqutsineq aammalu nutaaliornerit periarfissarsioriaatsillu. Ilinniartitaaneq nunarsuarmi tamarmi atorneqarsinnaassaaq ilinniartitsinermilu oqaatsit atorneqartussat danskisuujussapput ilinniarnerlu nunarsuarmi issittumilu aalisarnerni pissutsinut samminnittuussalluni.

”Aalisagaq nunat killeqarfiinik ilisimasaqanngilaq, nunarsuarmilu tamarmi uummassusillit tamavimmik imminnut ataqatiipput. Aamma silap pissusiata allanngoriartornera soqutigisaqaqatigiiffigaarput. Issittumi allangoriartuutit pisut tamakkulu periarfissiissutigisaannik tunngassuteqartunik nunarsuup sinnera Issitumiit ilikkagassaqaqaaq. Kalaallit Nunaanni Danmarkimilu aalisarnermut ingeniørinik amigaateqarpugut. Kalaallit Nunaanni Pinngortitaleriffik suleqatigilluareerparput, DTU-llu kissaatigisaraa suleqatigiinnerup ilinniartitaanernut tunngassuteqartunut annertusarneqarnissaa. Ilinniartitaanerit eqqarsaatigalugit Atlantikorsuup Avannaani nunani annertusaaqataarusuppugut”, Nina Qvistgaard oqarpoq.

Isumattorsaqatigiinnermi Royal Greenland, Polar Raajat, Kalaallit Nunaanni sulisitsisut, Ilinniartitaanermut-  Aalisarnermullu Naalakkersuisoqarfiit, Arctic Circle Business Sisimiuneersut, ARTEK Sisimiuneersut, Ilisimatusarfiup, Pinngortitaleriffiup DTU Aquallu allartitaats peqataapput.

Ilinniarneqarsinnaalersussaq qallunaat naalagaaffiannit aningaasalersorneqassaaq aammali Namminersorlutik Oqartussat tapeeqataaniarput. DTU Aqua-p ilinniarneqarsinnaalersussaq piviusunngortinniarlugu Danmarkimi Akkrediteringsinstitutionimut qinnuteqaatini september 2018-imi tuniunniarpaa.

 

Itinerusumik paasisaqarusunnermi saaffigisassaq:

DTU Aquami ilinniartitaanernut akisussaasoq uanilu pineqartumi suliami aqutsisuusoq Nina Qvistgaard oqarasuaat +45 40487790 imal. email: niq@remove-this.aqua.dtu.dk

<- Uterit

Aalisarnermut ingeniørinngorniarsinnaanissat pillugit Pinngortitaleriffimmi isumattorsaqatigiinneq.

Tunisassiortut Naalakkersuisoqarfiillu aallartitaat – qaninneq Inga Dora Markussen, Royal Greenlandimi ilinniartitaanernut pisortaq, tullialu Aalisarnermut Piniarnermullu Naalakkersuisoqarfimmiit Immikkoortortami pisortaq, Amalie Jessen.

DTU Aquami ilinniartitaanernut akisussaasoq Nina Qvistgaard oqaluttuarpoq aalisarnermi ingeniørinngorusullutik Nunatsinneersut Danmarkimeersullu ilinnialerusuttut 1.september 2019-imiit Sisimiuni ARTEK-ip ataani ilinnialersinnaassasut. Pilersaarutilli Danmarkimi Akkrediteringsinstitutionimiit ukiamut qinuteqarnikkut akueritinniaqqaartussaavaat.