Appat upernarnerani kitaata avannaatigut ingerlaarnerat

Appat ukiiffimminniit piaqqiffissaminnut uteriartuaarnerminni katersuukkallarnerat upernarnerani naammattoorneqarsinnaapput

Upernariartornerani appat ataatsimoortorpassuit kititsinni immami naammattoorneqarsinnaapput – Ingammik Aasiaat eqqaanni avannarpasinnerusumilu apparpassuit siaruaatsigatik kititsinni katersuunnerat naammattoorneqarsinnaapput. Appat tamakkua avannaani piaqqiorfissaminnut ingerlaartuupput, Kujataata kitaani, New Foundlandimi Labradorimilu ukeereersimallutik piaqqioriartortut. Taamaattumik apparpassuit piaqqiffissaminnut ingerlaartut kititsinni naammattoorneqarsinnaasarput.

Timmissat ilarpassui Canadamik Qaanaani Upernaviullu avannaani piaqqisartuupput. Ilaalli ikinnerujussuit Upernaviup kujataanut piaqqiorfimminnukartuupput, minnerunngitsumillu ilaat Qeqertarsuup Tunuani nungusaanngujoortuni Innami piaqqiortussaapput. Avannamukaartulli tamarluinnarmik piaqqiorsinnaasuupput avannaanut piaqqioriartortut.

Pinngortitaleriffiup ikinnerusunik pisaqaqqusilluni siunnersuuteqartara inuit tupigusuutigisaraat tusartaqaarput, Kalaallimmi Nunaata kitaani appat taamak amerlatigisut upernaakkut takusaramikkit.  Apparpassuit takugaanni isumaqanngilaq sumiiffinni ataatsiakkaani appat ikiliartunngitsut, apparpassuilli sumiiffinni assigiinngitsuni piaqqisartut ataatsimoornerat naammattuugassaavoq. Appallu piaqqisartut appat ikiliartunnginnissaannut pingaaruteqartorujussuupput, taamaattumik-una upernaakkut piniartarneq piujuartitsineruneq ajortoq. Appaqarfiit Qeqertarsuup tunuaniittut Upernaviullu kujataatungaaniittut ingammik mianerisassaaqaat, appallu ataatsimoorneranni takuneqarsinnaaneq ajorpoq sorliit appaqarfinnut ajornartorsiorfiunngitsunut, tassalu Qaanaap eqqaanut Canadallu avannaarsuanut ingerlaartuunersut sorliillu ikilivallaarfiusunut ingerlaartuunersut. Appaqarfiillu appaarunnissaat pinaveersimatissagaanni upernaakkut appanniarnissaq pinaveersimatinneqartariaqarpoq.

Annerusumik uani paasisaqarit

www.natur.gl/gl/miluumasunut-timmissanullu/timmissat/appat/qeqertarsuup-tunuani-appat-inaat-piujunnaarsinnaavoq/

www.natur.gl/fileadmin/user_files/Dokumenter/PAFU/Lomvier_2013_GRL_V1.0.pdf 

www.natur.gl/gl/attaveqatigiinneq/nutaarsiassat/gl/a/appat-nunatsinniittut-atugarliorput/

<- Uterit

[Translate to Kalaallisut:] Appat. Assiliisoq Fernando Ugarte

Appat. Assiliisoq Fernando Ugarte