Avaleraasartuut ikinneroqaat – pingaartumik Kalaallit Nunaata Islandillu imartaanniittut

30.08.18

ICES-mit avaleraasartooqassuseq pillugu aasarmaanna misissuinernit inernerit ippassaq avammut saqqummiunneqarput. Avaleraasartuut nunatta Islandillu imartaanniittartut aasarmanna siornamut sanil-liullugu ikinneralaarsuupput. Imartat pineqartut upernaarmanna aasarmannalu nillernerusimapput(Takussutissiaq 1 og Takussutissiaq 2).

Avaleraarsartooqassuseq paasiniarlugu ICES-imeersut naatsorsuinernik suliaqalinnginnerminni naatsorsuutigisimavaat avaleraasartooqassuseq appariaateqassasoq, 2017/2018-imimi nunat tamalaat katillugit pisarisimasaat pisassiissutigineqarsinnaasutut innersuussutigisanit amerlaneroqqissimammata. Pinngortitaleriffimmeersullu misissuinerisa ilimanarsisippaat avaleraasartooqassuseq suli ingasannerusumik appariaateqarsimagunartoq.

Avaleraarsartooqassutsimik 2017-imi misissuinerni ammassassuarnik upernarnerani suffisartunik Norge-meersunik avaleraasartoorniutinit Kalaallit Nunaanneersunit aamma naammattoorneqartartunik ukiormanna taamak soqanngilaq.

Avaleraasartuut Tuluit qeqertaaraasa imartaanni ukiisarput taakkunanilu aamma suffiniarnerusarlutik, aasaaneranilu tappiorannartunik neriniarlutik Kalaallit Nunaata imartaa ilangullugu Atlantikup avannaa-tungaata kitaaniittarluni. Avaleraasartuut kimmut illuariartalernerat imartat nillernerunerannik peqquteqartumik sunnerneqarsimanissaat ilimagineqarpoq.

Kalaallit Nunaanni Tunup imartaani avaleraasartuut malunnaatilissuarmik ikileriaraluartut taamaattoq avaleraasartoorniutit pisarisartakkamik amerlaqataannik 2018-ip aasaani attassisinnaassapput. Tamanna avaleraasartoorniutit Kalaallit Nunaanneersut aalisakkanik taakkuninnga aalisarnermik sungiussinerusimanerannik takussutissaasinnaavoq.

Pinngortitaleriffimmeersut Kalaallit Nunaata imartaani immap ikeraniittartunik aalisakkanik tappiorannartunillu misissuinerat nunat allat Norgep, Savalimmiut, Islandip Nordsøllu imartaani misissuinerat peqatigalugit ataqatigiissarlugillu ingerlanneqarput. Biologit misissuisarnerisa avaleraasartoorniartunut piffissami aalisarfissami peqassutsimik qanoq naatsorsuuteqarsinnaanerannik tikkuussisinnaapput.

Misissuinerni taakkunani ingerlatsisut biologit Savalimmiuni Torshavnimi nunat tamalaat imartani ilisimatusartarnerit pillugit siunnersuisooqatigivisa (ICES) ataani ilisimatuussutsikkut ataatsimiinnermi misissuinernit inernerpassuit saqqummiussorneqarlutik suliareqqinneqarlutillu sapaatip akunnerata matuma siuliani suliaqarput. Ataatsiminermit nalunaarusiaq Pinngortitaleriffiup nittartagaani atuarneqarsinnaavoq. Kalaallit Nunaanniit ava-leraasartooqasutsimik saqqummiussat nunat tamalaat tamakkerlutik Atlantikup avannaata imartaani avaleraasartooqassutsimik nalilersuinerannut ilanngunngunneqassapput. Avaleraasartooqassutsip tamakkerluni inissisimanera paasiniarlugu ilisimatusartartunut naatsorsuusiortinneqartunut Pinngortitaleriffimmeersoq suleqataavoq. Avaleraasartoortassiissutigineqarsinnaasutut 2019-imut innersuussutigineqartussat uki-ormanna oktoberip aallartisimalernerani piareerneqarnissaat naatsorsuutigineqarpoq.

 

Itierusumik paasisaqarusunnermi saaffigisassaq:

Aalisakkanut Qalerualinnullu Immikkoortortaqarfimmi seniorforsker Teunis Jansen oqarasuaat +45 21314997 imaluunniit mail: teja@remove-this.natur.gl.

<- Uterit

Takussutissiaq 1. Avaleraasartoortat (immap qaavatungaani (0-30 m) kalinnermi ataatsimi km2-ikkaarlugit pisat kiilunngor-lugit) 2018-imi. Ammalortut angissusaasa avaleraasartoortat oqimaassusinngorlugit amerlassusiat issoqqaarissullu imartami ava-leraasartooqassuseq oqimaassusinngorlugu takutippaat.

Takussutissiaq 2. Avaleraasartoortat (immap qaavatungaani (0-30 m) kalinnermi ataatsimi km2-ikkaarlugit pisat kiilunngor-lugit) 2017-imi. Ammalortut angissusaasa avaleraasartoortat oqimaassusinngorlugit amerlassusiat issoqqaarissullu imartami ava-leraasartooqassuseq oqimaassusinngorlugu takutippaat.