Holsteinsborg Dybimi saattuakinnerulerpoq

20.11.09

Sisimiut eqqaanni
2009-mi Sisimiut eqqaanni Holsteinsborg Dybimi saattuakinnerulersimanera biologinit Pinngortitaleriffimmeersunit paasineqarpoq. Paasissutissat aalisariutit allattaaviineersut aammalu biologit misissuineri naapertorlugit takuneqarsinnaavoq pullatini ataasiakkaani pisarineqartartut ikiliartorsimasut, aammalu saattuaaqqat siunissami aalisarneqarsinnaalersussat ikittoralaannguusut.

2008-p tungaanut saattuat amerliartorsimagaluarput, maannali tamanna illuanut saassimavoq. Taamaammat Pinngortitaleriffimmiit siunnersuutigineqarpoq Sisimiut avataanni 2010-mi pisat 200 tonsinit amerlanerussanngitsut, tassa 2009-mut sanilliullugu pisassat 100 tonsinik ikinnerussasut.

Paamiut eqqaanni
Paamiut eqqaanni sinerissap qanittuani aalisartut 2004-mit 2008-imut ukiut tamaasa 200 tonsit missaannik pisaqartarput. Aalisariutit allattaavii naapertorlugit piffissami tassani saattuarniat pullatini ataasiakkaani 7 kiilunik pisaqartarsimassasut Pinngortitaleriffimmiit naatsorsorneqarpoq. Paasissutissallu aallaavigalugit takuneqarsinnaavoq 200 tonsinik pisaqartoqartartillugu pisat aalaakaagallassasut.

Sumiiffinni allani
Kitaani sumiiffinni allani 2010-mi saattuarniarnermi pisassatut kaammattuutigineqartut siornamut naleqqiullutik allanngortinneqanngillat. Saattualli suli amerlisimangillat. Taamaammat mianersuullugit iluaqutigineqarnissaat, allanngoriartornerisa malinnaavigeqqissaarneqarnissaat, kiisalu kitaani aqutsivinni tamani iluaqutigineqarnerannut periusissiortoqarnissaa pingaaruteqarluinnarpoq.

Aqutsiviusuni tamani piffissaq saattuarniarfissaq kaammattuutigineqarpoq
Pinngortitaleriffiuttaaq kaammattuutigaa sumiiffinni aqutsiviusuni tamani piffissaq saattuarniarfiusoq martsip naaneraniit juulip qeqqanut ingerlassasoq. Piffissamik aalajangersimasumik aalisarfissaqartitsisalernikkut nutaanik pinngorartoqarnissaa qularnaarneqassaaq, ilaatigullu aamma eqqaaginnartarneq toqusoortarnerlu annikillineqassaaq taamalu pisuussutsit atorluarneqarnerulissallutik.

Apeqqutissaqaruit paasisaqarnerorusukkuilluunniit attaviguuk
Saattuanut biologi AnnDorte Burmeister
Pinngortitaleriffik
Oqarasuaat 36 12 00 imaluunniit e-mail

<- Uterit

Saattuarniat Nanna L-imi pullatit imaaraat biologit Sisimiuni misissuineranni