Holsteinsborg Dybimi saattuarniartoqarunnaarallarnissaa biologinit siunnersuutigineqarpoq

03.12.10

Allattoq:  Kitte

Sisimiut avataani Holsteinsborg Dybimi saattuanik pisuussutit 2009-mit 2010-mut ikileriarujussuarsimapput. Taamaattumik sumiiffimmi tassani saattuar­niartoqarunnaa­rallarnissaa Pinngortitalerifimmit Naalakkersuisunut siunnersuutigineqarpoq.

Sumiiffimmi saattuat ikiliartornerat pissutigalugu sumiiffimmi tassani siusinne­ru­suk­kut saattuarniarneq matuneqarsimavoq. 2005-imit 2007-ip tungaanut saattuarniarto­qanngin­nera­ni saattuat amerliartortut Pinngortitaleriffimmi misissuinerit takutippaat. Saattuarniarneq 2007-imi ammaqqinneqarpoq kisianni 2009-mit 2010-p tungaanut paasissutissat takutippaat saattuat ikiliartoqqilersimasut aammalu saattuat nutaat sumiiffim­mut tassunga takkussuuttartut 2004-misut ikitsigisut. Taamaattumik Holsteinsborg Dyb saattuarniarfittut matoqqinneqassasoq aamma sumiiffimmi atuinissamut periusiortoqassasoq Pinngortitaleriffimmit siunnersuutigineqarpoq.   

Aqutsisoqarfinnut allanut siunnersuinerit ataatsimut isigalugu allannguuteqar­pianngillat kisiannili sumiiffinni tamani tullinnguuttut makku pissutigalugit piffissani nalinginnaasumik aalisarfiusussat atuutsinneqalissasut Pinngortitaleriffimmit siunnersuutigineqarpoq

  1. takkussuuttut qulakkiissallugit, tassa imaappoq saattuat nutaat aalisarneqar­sinnaa­sunngorlutik takkussuuttut
  2. pisuussutinik pitsaanerusumik atuineq qulakkiissallugu

Tamatumunnga pissutaasoq tassaavoq saattuat amerlanersaat piffissami marsip aallartinneranit juulip qeqqata tungaanut qaleruaminnik taarsiisarnerat aamma Pinngortitalerifimmi misissuinerit takutippaat piffissami tamatumani saattuarniat saattuartarisartagaasa 60 – 80 %-ii nutaanik aqitsunillu nerpeqartarunartut. Tamakku nerpikippallaarnerat pissutigalugu tunineqarneq ajorput. Tamanna ilutigalugu saattuat nutaanik qaleruallit avalatseqqinneqartut aniguineq ajorput.

 

Paasissutissanik amerlanerusunik pissarsiniaraanni saattuanik biologi, AnnDorte Burmeister, Pinngortitaleriffik, oqarasuaatikkut 36 12 00-kkut imaluunniit e-mailikkut: anbu[@]natur.gl attaveqarfigineqarsinnaavoq.

Ilanngutassiaq aamma atuaruk:
Saattuat takkuteqqissinnaapput …tamannali sivisussaaq.

Siunnersuut pillugu annertunerusumik paasisaqarusukkaanni saalisagaq nassiutaq atuarneqarsinnaavoq

<- Uterit

Qeqertarsuup Tunuani Sisimiullu eqqaani umiarsuarmik R/V Sanna-mi ukiumoortumik saattuarniarnermi pullatini pisat ikittuinnaapput. Assiliisoq: AnnDorte Burmeister