Ilinniartitaanernut ilisimatusarnernullu illutassaq nutaaq sanaartorneqa-lerpoq

19.08.15

Allattoq:  PeMi

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko Ilinniartitaanermut, Kulturimut, Ilisimatusarnermut Ilageeqarnermullu Naalakkersuisoq Nivi Olsen peqatigalugu Nuummi sanaartugassamik nutaamik aallartitsillutik ualermanna siullermeersumik qaartitseqatigiissapput. Sanaartugassaq nutaaq tassaavoq Nunatsinni Pinngortitamik Ilisimatusarnermik Ilinniarfiup siullerpaap Kalaallit Nunaannilu Peqqissaanermik Ilisimatusarfiup illutassaat.

Pinngortitamik Ilisimatusarnermik Ilinniarfissap ingerlaasissaa Pinngortitaleriffiup, Ilisimatusarfiup aammalu Danmarkimi Universitetit suleqatigalugit piareersaasiorneqaleruttorpoq, sanaartorneqalersorlu upernaaq 2017 piareerneqarnerani aallarteriaannanngortussaavoq. Ilinniarfimmiit universitetini naammassisartut naligisaannik issittumi pinngortitalerinermik tunuliaqutalinnik ilinniartitsinermik, ilisimatusarnermik, pisortat namminersortullu suliffeqarfiutaanni aqutsinermik suliaqarsinnaasunik naammassinnittoqartalissaaq. Kalaallit Nunaannilu Peqqissaanermik Ilisimatusarfik, maannamut namminerisamik illutaqarsimanngitsoq, aalajangersimasumik sumiiffeqalernermigut Nunatsinnut iluaqutaasussamik peqqissutsimik ilisimatusarnernik annertusaasinnaanngussaaq. Suliniutitigut pineqartutigut ilinniartitaanermik, ilisimasaqassutsimik piginnaasatigullu qaffassaasoqassaaq, tamarmik inuiaqatigiit nammineernerujartornissaannik kissaateqarnermut kaamisaasuusussat.

 "Neriuppunga avatangiisit nutaat Kalaallit Nunaanni ilinniartitaanermik ilisimatusarnermillu pitsanngueqataasinnaassasut, taamaalillunilu sulisutta ilinniagartuut, pinngortitami ilisimatusarnermik tunuliaqutaqartut pisariaqartitavut amerliartortut pissarsiarineqarsinnaanissaat anguneqassasoq. Tamanna aqqutigalugu inuiaqatigiinni ineriartornerup pisuussutitsinnillu uumassusilinnik atorluaanerup attanneqarsinnaasup suli pitsaanerusumik piareersimaffigisinnaanissaat qulakkiissavarput," Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko qaartitsinermut siullermut atatillugu ilaatigut taama oqaaseqarpoq.

 ”Qaartitsineq una aamma inuusuttortatta periarfissarisinnaasaannik killilersuutaasunik qaartitsinertut taasariaavoq. Pinngortitaleriffiup ilaneqaqqinnissaagut nunatta oqaluttuarisaanerani siullerpaamik nunarsuarmioqatitsinnut nallersuuttumik pinngortitamik ilisimatusarnermik ilinniarfimmik pilersitsisoqarsinnaalissaaq. Inuusuttut pinngortitaq pillugu ilisimatusarnissamik soqutigisallit soqutigisaminnik Nunatsinnut Issittumullu samminninnerusumik aallaaveqarlutik pikkorissarfigisinnaanngussavaat imminerminnut inuiaqatiminnullu nuannaarutissaasumik”, Ilinniartitaanermut, Kulturimut, Ilisimatusarnermut Ilageeqarnermullu Naalakkersuisoq Nivi Olsen sanaartugassaq aallartillugu qaartsitsinermi toorseqataasooq oqaaseqarpoq.

 Ilisimatusarnerit Nunatsinnut inuinullu iluaqutaanerusussat

Suliniutikkut ilisimatusariaatsit akimorneralugit tamakkiimanerusumillu eqqarsariartaaseqarluni ilisimatusariaaseqalernissaq aamma anguniarneqarpoq, kiisalu Pinngortitaleriffiup Ilimmarfiullu inissisimavianni ilinniarfeqarfinnik katersuinissaq. Ilinniarfeqarfinnik katersuinerunikkut Nuup issittumi ilisimatusarnerni aallaaviunerusutut inissisimanerulernissaa angorusunneqarpoq. Taamaaliornikkut nunat allamiut Nunatsinni ilisimatusartarnerisa kalaallinut inuiaqatigiinnut attuumassuteqarnerulernissaat piinnarnagu ilisimasaminnik maanga nunamut inuinullu maanilu inooqataanermikkut tunniussaqarnerusalernissaat anguniarneqarpoq. Kiisalu Sisimiuni Sanaartornermik Ilinniarfiup ataani qaffasissumik universitetini ilinniartitaanikkut ARTEK-imik taasat qanimut suleqatigineqarnissaattaaq siunertarineqarpoq.

 Sanaartugassap aningaasalersorneqarnera

Sanaartugassaq Nuummi titartaasartunit TNT Nuummit titartarneqarpoq, Permagreenilu sanaartortuussalluni. Sanaartugassaq tamakkerluni, tassa pisattat misissuisarfinnilu atortuutit immikkut ittut ilanngullugit, 50 mio. koruunit missaanni akeqassaaq. Taakkunannga amerlanerpaartaat aningaasaateqarfimmit Aage V. Jensen Charity Foundation, Karen Elise Jensens Fond, Jelling Foundation, NOJ-Fonden aamma Holkegaardfonden, tamarmik inunnit sanasut naalagaannut Aage V. Jensenimut attuumassuteqartunit pilersinneqarsimasunit aningaasaliissutaapput; kiisalu aningaasaateqarfik Maersk Oil Kalaallit Nunaat (piginneqataasut Tullow Oil aamma Nunaoil ilaallutik) Namminersorlutik Oqartussanik isumaqatigiissusiorsimanerat aqqutigalugu illuliassap misissuisarfittassaanik aningaasaliisuuvoq.

  

Itinerusumik paasisaqarusunnermi saaffigisassaq:

Pisortaq Klaus Nygaard, oqarasuaat 361200, mail nygaard@remove-this.natur.gl

Fiilit
forside_SA_og_SB_xx.jpg621 Ki

<- Uterit

Sanaartugassaq 2017-ip upernarnerani naammassiguni taama isikkoqassaaq. Assiliaq illussanik titartaasartunit TNT Nuuk-mit suliaavoq.