Issittumi ilisimatusartartunngorniartut ph.d.-nngorniartut pinga-sut aningaasaliiffigineqarput

14.05.18

Kalaallit Nunaanni Ilisimatusarnermut Siunnersuisooqatigiit kingullermik ataatsimiinnerminni ph.d.-nngorniutissanik aningaasaliissutinik qinnuteqartunit pingasut tunineqarnissaat innersuussutigaat. Ilisimatusartartunngorniartunut aningaasaliissutigineqartartut qallunaat Aningaasanut inatsisaannit aammalu Namminersorlutik Oqartussat ilisimatusarnernut siuarsaatitut aningaasaliissutigisartagaannit matussuserneqartarput. Taakkunannga siunertaavoq qallunaat kalaallillu ilisimatusarnikkut suleqatigiinnerisa siuarsarneqarnissaat kiisalu maani nunatsinni ilisimatusartartut amerlanerusut najugaqarlutik ilisimatusarnerminnik ingerlatsisarnissaannik kaamisaanissaq. Aningaasaliissutigineqartartut Pinngortitaleriffimmit aqunneqarput.

Trine Louise Jul Larsen Ilisimatusarfimmi Syddansk Universitet-imilu pd.d.-nngorniummik ingerlassaqalissaaq sammisaallugulu Kalaallit Nunaanni sukkornermik aallaaveqartumik isikkut nappaateqalertarnerup ilisimassutsip inummeersuunngitsup aammalu attaveqaatit atorlugit nakorsiartitsisarnermi atortut atorlugit misissueriaatsit.

 Manh Coung Ngo Københavns Universitetiani ph.d.-nngormiummik ingerlassaqalersutut aallartissaaq sammissallugu imaani miluumasut inuit pilersitaannut qisuariartarnerisa qarasaasiaq atorlugu naatsorsueriaasiliuunneqarnissaa. Suliniut Pinngortitaleriffiup ataani ingerlanneqassaaq.

 Louise Andersen ph.d.-nngorniatut Ilisimatusarfimmi aallartissaaq, sammissallugu qulequtsersimasani ”Atuarfiup atuartut inuusuttunngorlutik ilinnartitaanernut ingerlaqqiffiusunut pisinnaanngorlugit piareersassavai”.

Ph.d.-nngorniutissanut post doc-itullu ingerlaqqinnissamut aningaasaliissutinik pissarniarlutik inuit 25-t qinnuteqarsimapput. Qinnuteqartut tamakkerlutik aningaasaliiffigineqassagaluarpata tamanna 53 mio. koruuninik naleqassagaluarpoq, kisiannili siunertamut pineqartumut matumunnga tunngassueqartut aningaasaliissutit taamaallaat 7 mio. koruunit missaanniipput, taamaalillunilu ilinniaqqinniartunut inunnut pingasunut aningaasaliisoqarluni.

 

Itinerusumik paasisaqarusunnermi saaffigisassaq:

Pinngortitaleriffiup pisortaanerunera Klaus Nygaard oqarasuaat 361200 imaluunniit nygaard@remove-this.natur.gl

<- Uterit