Issittumi uumassuseqarnerup assgiinngisitaarnera pillugu ilisimatusartartut nunarsuarmioqatigiit suleqatigiinnerat

08.11.19

Ilisimatusartartut Nunap Inoqqaavisalu aallartitaat katillugit 50-it missaanniittut ulluni kingullerni Nuummiipput, Issittup pinngortitaani imaanilu avatangiisini allannguutit maluginiakkatik isumasioqatigiissutigalugit. Isumasioqatigiinnerni qitiutillugit oqallisigineqarput uumasoqatigiiaat, uumassusillillu ataqatigiiffiinut tunngassutillit, uumassuseqassutsip assingiinngisittaarneranut tunngassutillit silallu pissusiata allanngorneranut tunngassutillit.

Isumasioqatigiinnerit Pinngortitaleriffimmi ingerlanneqartut Issittumi Siunnersuisooqatigiit ataanni aaqqissuussaapput. Ilisimatusartartut Issittumeersut 2017-imi nalunaarusioqatigiipput taasaminnik, State of The Arctic Biodiversity Report (Issittumi uummassuseqassutsip assigiinngisitaarnerata killiffia pillugu nalunaarusiaq); tassani Issittumi uumassuseqarnerup assigiinngisitaassusiata allannguuteqarfiunera allaaserineqarluni. Nalunaarusiami ilaatigut Issittormiut uumassuseqarnerup assigiinngisitaassusiata killiffia malinnaaffiginiarlugu siunissami misissuisarnissani suleqataasarnissaannnut siunnersuutit allaaserineqarput.

Isumasioqatigiinnermi immikkut ilisimasalippassuit peqataasut isumaqatigiissutigaat Issittumi pinngortitaq sukkasuupilorujussuarmik allanngoriartormat, tamaammallu malinnaaffiginissaat iliuusissallu suleqatigiiissutiginissaat pingaaruteqartorujussuupput.

Issittumi inuuniarneq uumassuseqassutsip allannguuteqarfiuneranit sunnersimaneqartupilussuuvoq. Piniagassat ilaasa pissarsiariniartarnerallu ajornarnerulernikuupput, uumasoqatigiiaat Issittumiittartut avannamut illuariartorput uumasoqatigiiaallu kujasinnerusumeersut takkussuukkiartuaarput. Taamaattumik tamakku allannguutit pillugit ilisimatuussutsikkut siunnersuinerit pingaaruteqarput, Issittumi innuttaasut allannguutinut iliuuseqarnissaminnut aallaavissaqarsinnaaniassammata. Ilisimatusartartut isumaqarput Issittoq tamaaat isigalugu uumassusillit assigiinngisitaarnerat tamakkualu uummaviisa ataqatigiiffigisaanni allanngornissaarsuarnik malunnaateqartunik pisoqalerunavissoq.Taamaattumik allannguutit pisut pisussallu pillugit ataqatigiissumik ilisimatuussutsikkut siunnersuisoqarnissaanik pisariaqartitsineq angisoorujussuuvoq Issittumi tamarmi innuttaasut isummersoqataasinnaaniassammata.

Isumasioqatigiissitsinernit anguniarneqarpoq allannguutit pisut ingerlaqqittumik qanoq malinnaaviginissaat taamaaliortarnerillu pitsanngorsarneqarnissaat anguneqarsinnaasoq oqallisigissallugit. Tamatuma saniatigut Issittumi innuttaasut paasisatigut angusarisanik qanoq iliorluni pitsaanerpaamik paasiuminarnerpaamillu paasitinneqartarnissaat oqallisigineqarpoq.

Ataatsimiinerit Pinngortitamut Avatangiisinullu Naalakkersuisoqarfimmeersunit, Pinngortitaleriffimmeersunit CAFF´illu (Conservation of Arctic Flora and Fauna) Allattoqarfiannneersunit qanimut suleqatigiissutigineqarlutik ingerlanneqarput.

Ataatsimeeqatigiinnerni ulluni makkunani ingerlanneqartuni taamatut nunat tamalaat aammalu nunatta suleqataaffigisaani suleqatigiissuteqarnissat qanoq iliorluni aaqqissuunneqarsinnaanerat eqqartorneqarluni siunnersuusiorfigineqarpoq. Ilisimatusartartut nalunaarusiassaat paasissutissiisarnissallu siunissami ingerlanneqartussat qanoq aaqqissuunneqarsinnaanerat kiisalu silap pissusiata allanngornerata issittup uumasuinut taakkulu uummaviinut sunniutaat pillugit paasissutissiisarnissani angorusutat qanoq iliorluni pitsaanerpaamik anguneqarsinnaanerat pilersaarusiorneqarput. Apeqqutit taama ittut akissutissarsinissaat iliuuusissallu pillugit pilersaarutissatut siunnersuut CAFF´ip ataani februar 2020 ataatsiminnissami saqqummiunneqarnisssaat pilersaarutaavoq.

 

Itinerusumik paasisaqarusummermi attavigisassaq:

Pingortitaleriffimmi Silap Pissusianik Ilisimatusarfimmi ilisimatusartartoq Thomas Juul-Pedersen oqarasuaat +299 360000 imal. mail: thpe@natur.gl

<- Uterit

Asseq: Peter Schmidt Mikkelsen