Kalaallit Nunaata kitaata imartaani raajat siuariaateqalaarput

Kalaallit Nunaata kitaata imartaani raajat 105.000 tonsit angullugit pisarineqarsinnaapput. Taama NAFO Kalaallit Nunaata kitaata imartaanni 2018-imut raajartassiissutigineqarsinnaasunik innersuussuteqarpoq. Raajat pillugit siunnersuinerit Naalakkersuisunut ingerlatinneqaqqammerput, Naalakkersuisullu taakkuupput Nunatta imartaani raajartassiissutissanik aaliangersaasartut.

Kalaallit Nunaata kitaata imartaani raajartassiissutigineqarsinnaasutut innersuussutit 2016-imut 90.000 tonsinut naatsorsorneqarsimanerinut sanilliullugit 17 %-imik qaffariaateqarput. Raajartassiissutigineqarsinnaasunik qaffaassuteqarnermi paasissutissat biologit misissuisarnerinit, raajarniartartut paasissutissaataannit kiisalu naatsorsuusiornernit pissarsiarineqartut raajaqassutsip siuariaateqarsimaneranik inerneqarnerannik tunngaveqarput.

Ilisimatusartartut Kalaallit Nunaata kitaata imartaani raajaqassuseq paasiniarlugu 2017-ip naajartornerani naatsorsuusiornerisa takutippaat piujuartitsiniarneq eqqarsaatigalugu peqassuseq maanna ajunngitsumik inissisimasoq. Raajat raajaqassutsip piujuartitsiniarnermik tunngaveqartumik iluaqutigineqarnissaa qulakkeerniarlugu peqassutsip annikinnerpaaffissaa qaangerlugu Nunatta Kitaata imartaani maanna samerlassuseqarput.

Raajaqassuseq naatsorsuusiornerit tunngavigalugit annertussusilerneqartarpoq. Naatsorsuusiornerni taamaattuni raajarniartartut pisarisartagaannit kisitsisit, biologit misissuisarnerini raajaqassutsip oqimaassusinngorlugu annertussusilerneqarnerinit kisitsisinik, raajarniat kalinnermi ataatsimi pisarisartagaasa annertussusiannut tunngassuteqartut kisitsisit kiisalu saarulliit raajanik nerisussatut naatsorsuutigineqartut amerlassusiat ilanngunneqartarpoq.

Tamakku aallaavigalugit NAFO´p aaliangerpaa pisassiissutigineqarsinnaasutut innersuussutigineqartoq 105.000 tonsinut inissinneqassasoq.

Tunup imartaani raajaqassuseq suli appasittumiittuarsinnarpoq, naak tappavani ukiuni arlaqalersuni annertugisassaanngitsumik raajarniartoqartaraluartoq. Taamaattumik tappavani raajarniarneq pillugu siunnersuineq allannguuteqanngilaq.

Itinerusumik paasisaqarusunnermi saaffigisassaq:

Aalisakkanut Qalerualinnullu Immikkoortortaqarfimmi ilisimatusartartoq AnnDorte Burmeister, oqarasuaat 361200 imal. mail:
anbu@remove-this.natur.gl

<- Uterit

Assi: Pinngortitaleriffik