Kinamiit Nunatsinnut tunissutit – Nunatta qaammataasamiit assingi

22.08.16

Kiinamiit atorfillit ilisimatusartartullu nuimasut Kinami Ilisimatusarnermut Teknologimullu Ministereqarfimmeersut aammalu Beijing-imi Normal Ilisimatusarfeqarfimmeersut aammalu Shanghai-mi Nunalerinermik Ilisimatusarfeqarfimmeersut sapaatip akunnera kingulleq tikeraaqqammerput. Assilisat 108-nik amerlassusillit LANDSAT 8 qaammataasamit assilisanik taaneqartarput, taakkulu katiteraanni Nunarput tamakkerluni assilineqarsimalluni. Assiliisarnerit pipput qaammatini juli aamma august 2014-imi 2015-imilu, assillu maanna Pinngortitaleriffimmut tunniussimaneqalerput.

Qaammataasamit assilisat naammaginartumik pitsaassusillit pilersinniarnerat ajornakusoortuusinnaavoq. Sorpassuit iluatsilluarnissaat pisariaqarpoq, soorlu aamma sila assiliiniarnerup nalaani ajungittariaqartoq. Qaammataasaq nunarsuatsinnik kaajallaasarpoq ullut 16-it ingerlanerini, sarsunneratalu nalaani sila pitsaavallaarsimanngippat, tassa kisianni aamma ullorpassuit 16-it utaqqeqqilluni.

Qaammatasaamit assilisat Pinngortitaleriffik Oqaasileriffillu peqatigalugit suliarineqarput. Taaneqartup kingulliup nunap aqqisa eqqortuunissaat qulakkeertussaallugit.

”Assit uku Kalaallit Nunaannut – inissaviannut – tunniussinnaagatsigit nuannaarutigeqaarput. Aperisoqarsinnaavoq sooq aamma Kina nunap assinginik taama ittunik soqutiginninnersoq. Soqutiginnittorujussuuvugut, ingammik sermersuup aakkiartorneranik malinnaalluarnissarput pingaaruteqaqimmat, Kinammi imartaata qaffasissusia toqqaannartumik sunnersimaneqalereermat. Kinami qarsutsisarnerit misillerfigisalereerpagut. Aamma eqqarsaatigisassaraarput Kinap kangiatungaata nunap sinneranut sanilliullugu appasinnerusumiinnera. Nunap ilaa tamanna sanaartugarpassuit eqqarsaatigalugit aammalu nunap sinneranut sanilliullugu inerisagaanerunerujussua. Illoqarferujussuit tamaaniittut sunnerneqanngitsoornavianngillat. Nunarsuarput tamarmi ataqatigiippoq, taamaammallu Issittumi allangoriartuutit Kinamit soqutigineqarlutik malinnaaffigeqqissaarneqarput”, Beijing Normal Universitetip Issittumi Imaanullu tunngatillugu ilisimatusarfeqarfiani pisortaq Xiau Cheng nassuiaavoq.

”Nunap assingi CD-ertaalu pissarsiarisagut Pinngortitaleriffimmi ilisimatusartartut sulinerminni assersuutigalugu tuttunut nunallu pissusianik misissuinerminni tunuliaquttatut atortarsinnaassavaat”, Pinngortitaleriffimmi paasissutissanik suliareqqiisartoq, GIS-manager, Karl Zinglersen oqarpoq.

Taama nunap assinginik tunniussaqarnermut atatillugu siunissami ilisimatusaatigineqarsinnaasunik suleqatigiissutigineqarsinnaasunillu allanik eqqartueqatigiittoqarportaaq. Kinamiit aallartitat ilaatigut imaata pissusianik aammalu immap sikuata siaruarsimaneranik ilisimatusaateqaqatigiissinnaanerit periarfissatut taavaat. Ilanngullugu aamma oqaluttuaraat Issittumi taartartumilu naatitanik naatitsiniartarnernik misilittakkatik: angalaqataasut ilaat Shanghai Academy of Agricultural Sciences-imeesoq, tassa Shanghai-imi nunalerinermik ilisimatusarfimmeersoq ilisimatusartartoq, Qiang Zhou, taartumi issittumilu naatitanik naatitsisinnaanermik immikkut ilisimatusaateqarsimavoq. Tassami Qalasersuarmi Kujallermi iluatsilluartumik naatitanik naatitsisarsimavoq – immaqaliaa ilisimasai aamma maani atorlusinnaasassarsuagut.

<- Uterit

Saamimmiit talerpimmut: Professor Qiang Zhou pisortaq aamma ilisimatusarfeqarfimmi ilinniartitsisoq Shengbiao Huang, Karl Brix Zinglersen (Pinngortitaleriffik), Pisortaaneq Chuanhong Chen, Ilisimatusarfeqarfiup immikkoortortaani pisortaq Xiao Cheng kiisalu Yu Jia (Pinngortitaleriffik)

Ilisimatusarfeqarfiup immikkoortortaani pisortap Xiao Cheng-ip nunap assingi Pinngortitaleriffimmeersumut Karl Zinglersen-imut tunnuippai