Klaus Nygaard Rinkip nersornaataanik nersornaaserneqarpoq

Det Grønlandske Selskabip siulersuisuisa Danmarkimi nersornaaseqqammerpaat Pinngortitaleriffiup pisortaanera, Klaus Nygaard Rinkip nersornaataanik taaneqartartumik.  Rinkip nersornaataa inunnut Kalaallit Nunaannut tunngasumik ilisimatusarnerup silarsuaani immikkullaarissumik suliniuteqarsimasunut tunniunneqartarpoq allatigulluunniit inuiaqatigiinnut kalaallinut pingaaruteqartumik iliuuseqarsimasunut tunniunneqartarpoq. 

”Pilersitsivutit ilisimaareqqissaarlugu ilisimatusarnerup pitsaassuseqarnissaata aammalu soqutigisanut arlaannaannulluunniit attuumassuteqanngitsumik ingerlanneqartarnissaata pingaarutanik, tamannaannaanngitsorlu aammalu ilisimatusarnerup inuiaqatigiinnit avatangiiserisanit atorneqarsinnaasuunissaanik qulakkeerinninnissap pingaarutaanik paasinnillutit.

Illit immikkuullarilluinnartunik piginnaaneqarlutit suliffeqarfiup kalaallit inuiaqatigiit inuussutissarsiornikkut tunngaviisa pingaarnerpartaat pillugit ilisimatuussutsikkut siunnersuisarnerit ataqqisaalersimasut pilersissimavatit – tassa pisuussutinik uumassusilinnik raajanik, aalisakkanik, imaani nunamilu miluumasunik timmissanillu iluaquteqartarnerat pillugit siunnersuisarnerit pivagut.

Illit inuussutissarsiortunit naalakkersuinikkullu suliaqartunit siunnersuisarnissinnik tapersersorneqalerneq akuerinninnerlu pilersissimavatit, naak pisassiissutigineqarsinnaasutut siunnersuutigisartakkasi qaqutiguinnaq nuannaarutigineqartaraluartut.”, Det Grønlandske Selskabip siulittaasua Johnny Fredericia ilaatigut Klaus Nygaard pillugu oqalugiarnermini oqarpoq.

Taassumalu Det Grønlandske Selskabip H.J.Rinkip inunngorneraniit ukiut 200-nngorneranik nalliuttorsiutiginninnermi pilluaqqusilluni oqalugiaatini ima naggaserpai

”Nersornaat inummik nersorinninniutaavoq. Kisianni ilisimatusarnerit siunnersuisarnernillu suliaqartarnerit nutaaliaasut inuup ataatsip kisimiilluinnarluni pilersissinnaanngilai. Taamaattumik nersorinnissut una ilinnuinnaanngitsoq, kisiannili ilisimatusarfeqarfissinnut tamarmut sulisuinullu pikkorissunut pimoorussisunullu aamma nersorinninniutaavoq.”.

Taamaalilluni Klaus Nygaard nersornaaserneqarsimasut inuit nuimasut Kalaallillu Nunaata oqaluttuarisaaneranut pingaaruteqarsimasut akornanni allassimalerpoq. Rinkip nersornaataanik nersornaaserneqarsimasut ilaatigut makkuupput: Robert Petersen, Minik Rosing, Lauge Kock, Ejner Mikkelsen, Eigil Knuth, Frederik Nielsen, Sara Helms, Christian Berthelsen, Jens Rosing, Christian Vibe, Jens Dahl aammalu Helge Larsen.

Soqutigisaqatigiit Det Grønlandske Selskab 1905-imi pilersinneqarnerminniit sulissutigisimavaat Kalaallit Nunaannut inuiaqatigiinnut kalaallinullu soqutiginnnerup, pingaartumik Danmarkimi, attatiinnarneqarnissaa annertusarneqarnissaalu. Oqalugiartitsisarnerit oqallititsisarnerillu saniatigut soqutigisaqatigiit naqitanik saqqummersitsisarsimapput ilaatigut ”Tidskriftet Grønland” aammalu ”Polarfronten” saqqummersittarlugit.
Det Grønlandske Selskabip siulittaasuata, Johnny Fredericiap, Klaus Nygaardip Rinkip nersornaataanik tunineqarneranut tunngavilersuutai tamakkiisut tusagassiuutinut nalunaarutaani Pinngortitaleriffiup nittartagaani takuneqarsinnaallutik atuarneqarsinnaapput. 

Det Grønlandske Selskabip tusagassiutinut nalunaarutaa uani atuaruk.

Attaveqarfissat:
Johnny Fredericia, siulittaasoq, Det Grønlandske Selskab dgls@remove-this.dgls.dk imaluunniit +45 21 46 32 44

Klaus Nygaard, Pinngortitaleriffiup pisortaanera, oqarasuaat +299 55 12 42

<- Uterit

Klaus Nygaard, Rinkip nersornaataanik nersornaaserneqartoq. Assiliisoq: Svend Nørgaard Andersen.

Klaus Nygaard. Assiliisoq: Inge Bisgaard.

Rinkip nersornaataa 13-issaat nersornaasiutigineqarpoq. Asseq: Det Grønlandske Selskab.