Nunatta imartaani saattuaqassuseq pitsanngoriaateqalaalaarpoq

26.11.15

Allattoq:  PeMi

Nunatta imartaani saattuaqassuseq ukiut arlerlugit ajortumik inissisimasinnarluni maannakkut pitsanngoriaateqalaalaarsimavoq. Aqutsiveqarfinni tamangajanni ukiut arlerlugit piisatsitsisoqareerluni ukiormanna 2015-imi appariartortuartoqarsimanera sumiiffiit ilaanni illuanut saariarsimarpasippoq – matumani aqutsiveqarfiit Sisimiut aamma Nuuk-Paamiut eqqarsaatigineqarlutik. Taammaattorli pineqartuni pitsaap tungaanut saariartoqarsimanera ukiuni aggersuni taamaaginnarsinnaanissaa soorunalimi ilisimaneqanngilaq. Taamaammat saattuaqassutsip siunissamissaaq aalaakkaasumik inuussutissarsiutigineqarsinnaanissaa qulakkeerniarlugu sumiiffiit peqarfiusut malinnaaffigineqaannavittariaqaraluarput.

Sisimiut eqqaanni saattuarniarfiusartuni saattuarniarnermit aammalu biologit misissuisarnerinit paasissutissat pissarsiarineqartut takutippaat pineqartuni peqassuseq 2009-miit 2014-imut appariartuinnavissimasoq. Taamaattoqarneralu 2015-imi unissimavoq, takussutissaqarporlu peqassuseq siuariartulaalersimasoq. 2016-imut pisassiissutit 300 tonsiusut ilaneqaratik attanneqarsinnaassappata amerleriarsinnaanissaannut periarfissarissaarnerulissaaq siunissamilu aalaakkaanerusumik iluaqutiginiarneqarsinnaalissallutik.

Sisimiut avataanni peqassuseq 2014-ip tungaanut appasittumiittuarsimavoq, ukiormannali peqassuseq siuariaateqalaarsimavoq. Taamaattorli sumiiffiup matoqqatinneqarnissaa innersuussutigineqarpoq. Tassami peqarnerulaalernera peqqutigalugu ammarneqassappat peqassuseq erngerluni appapallaqqittartoq misilittakkat takutereermassuk.

Pinngortitaleriffik aqutsiveqarfimmi Nuuk-Paamiumi misissuinernik ingerlataqarsimanngilaq, taamaammallu tamaani peqassutsimik paasisassarsiorsimanerit paasissutissanik pissarsiffigisamit ataasiinnarmit toqqammaveqarput, tassalu saattuarniartartut nalunaarsuutaannit. Nalunaarsuutit misissornerinit peqassuseq aalaakkaasumik inissisimasut isikkoqarsorinarpoq. Sinerissap qanittuanut pisassiissutigineqarsinnaasutut innersuussutigineqarput 200 tonsit avataanullu 1.000 tonsit pisassiissutigeqqinneqarnissaat innersuussutigineqarluni

Pinngortitaleriffiup saattuat pillugit siunnersuisarnermigut saattuakilliartornera pakkersimaarniartarsimavaa. Saattuat amerliartussappata aqutsiveqarfinni ataasiakkaani pisarineqartartut pisassiissutigineqarsinnaasutut innersuussutigineqartunit suli ikinnerutinneqartariaqarput. Ilanngullugu Pinngortitaleriffiup innersuussutigaa saattuarniartarneq qaammatit martsip naaneraniit juulip qeqqata tungaanut aqutsiveqarfinni tamani ingerlanneqartarnissaa, taamaaliornikkut saattuanik ”qituttunik qalerualinnik” avammut eqqaaginnartarneq ingalassimaneqarsinnaammat saattuaqassutsimillu atorluaanerusoqalerluni.

Link

 

Itinerusumik paasissaqarusunnermi saaffigisassaq:
Ilisimatusartartoq AnnDorte Burmeister oqarasuaat 361200 imal. email: anbu@remove-this.natur.gl

<- Uterit

Asseq: AnnDorte Burmeister