Nunatta kitaata imartaani raajaqassutsip apparaluttuinnarnera allanngorpoq

24.09.15

2016-imut raajat 90.000 tonsit. Tassa taama biologit Kalaallit Nunaata kitaata imartaani 2016-imi raajartassiissutigineqarsinnaasunik siunnersuipput. Peqatigitillugulu biologit erseqqissaatigaat raajaqassutsip nammassinnaasaa eqqarsaatigalugu pisassiissutigineqarsinnaasutut innersuussutigineqartut sipporneqartariaqanngikkaluartut. Aappaagumut raajartassiissutigineqarsinnaasutut siunnersuutigineqarsimasunit ukiormannamut innersuussutigineqartut taamaalilluni 30.000 tonsinik qaffariaateqarput, ukiormannamummi 60.000 tonsit innersuussutigineqarnikuummata.

Pinngortitaleriffimmeersut ukiormanna misissuisarnerisa ersersippaat raajaaqqat siunissami aalisarneqarsinnalerumaartussat takkussuulluartut, taamaattumillu peqassutsip ukiuni aggersuni qaffariaateqarnissaanik isumallualersitsillutik. Taamaalilluni raajaqassutsip ukiuni qulini kingullerni ammuinnaq ingerlaarsimanerigalua mumittutut isikkoqalerpoq.

Nunatta kitaata imartaani 2016-imut biologit raajartassiissutigineqarsinnaasut pillugit siunnersuinerminni makku tunngavilersuutigaat:

  • Raajaqassutsip sivitsortumik ammuinnaq ingerlasimanerigalua 2015-imi allannguuteqarpoq
  • mikisut perortussat (takkussuuttut) aalisarneqarsinnaalersussat amerliartormata, ukiuni kingullerni qulini amerlanerpaaffigisimasamittungajak amerlassuseqarlutik
  • raajaaqqat (marlunnik ukiullit) ukiuni 20-ni kingullerni agguaqatigiissillugu amerlassuserisarsimasaminniit amerlanerummata
  • saarulliit ukiuni siuliani pingasunituullu raajartortiginissaat naatsorsuutigineqarmat
  • pisarineqartartut 2008-imiilli ikiliartortuaarsimapput 2015-imi 65 tonsiunissaat ilimagineqarluni.

Kitaata imartaani raajaqassutsip qaffariaateqarneranut raajaaqqallu takkussuuttut amerleriarsimanerannut peqqutaasut arlaqarput. Pisaasartut 2008-miilli appariartorsimanerisa – pisassiissutaasartut appariartuinnarsimanerannik peqquteqartumik – kingunerisaanik raajaqassutsip ilanngartorneqarnikinnerunerminit ”oqilisaanneqarsimassaa” ilimagineqarpoq. Kiisalu aamma ukiuni arlaqalersuni arnaviarpassuit akuunerat peqqutaalluni peqassutsimut iluaqutaasumik piaqqiorluarsimanissaat ilimagineqarpoq.

Ilisimatuussutsikkut ataatsimiititaliap nunarpassuarnit peqataaffigineqartup, siunnersuinernillu suliaqartartup, raajaqassuseq paasiniarlugu qarasaasiaq atorlugu naatsorsueriaatsiminik 2015-imi pitsanngoriartitsisimavoq.  Naatsorsueriaaseq suli ineriartortinneqarpoq pitsanngorsarneqartuarlunilu

Kalaallit Nunaanni Tunup imartaani 2016-imut raajartassiissutigineqarsinnaasutut innersuussutigineqarput 2.000 tonsit, taamaalillunilu ukiormannamut innersuussutigineqartunit allannguuteqartoqarani.

Siunnersuineq uani atuarnearsinnaavoq.

 

Sukumiinerusumik paasisaqarusunnermi saaffigisassaq:

Aalisakkanut Qalerualinnullu Immikkoortortami pisortaq Helle Siegstad oqarasuaat 361200 imaluunniit mail: hesi@remove-this.natur.gl

<- Uterit

Assiliisoq: Carsten Egevang