Pinngortitalerriffik A/C fuldmægtigimik sulisussarsiorpoq

25.10.18

Pinngortitaleriffimmi suliassanik suliniutinillu nutaanik, pissanganartunik soqutiginartunillu amerlaqisunik suliassaqarluni ineriartortitsiffiusorujussuuvoq. Malinnaasinnaajumalluni Pinngortitaleriffimmi aaqqissuussaanermik allanngortitsisoqarsimavoq, taamaattumillu maannakkut allaffissornermi immikkoortortaqarfimmut A/C fuldmægtigimik sulisussarsiorpugut.

Pinngortitaleriffimmi allaffimmi suleqatinut tamatigoortunut inussiarnertunullu suleqatissarsiorpugut, taannalu ilisimatusarfimmik nukittuumik Pinngortitaleriffimmi allaffimmiut allat peqatigalugit ineriartortitseqataalluni ilisimatusaatissanik qinnuteqaatinik missingersuusioqataasassaaq, aningaasanik aqutseqataasassaaq allanillu allaffissornermi aqutsinernut Pinngortitaleriffimmi nalilersuinernut peqataasassalluni.

Atorfik:

Suliniutinut aningaasanik aqutsisutut allaffimmiut suleqatigilissavatit aammalu immikkoortortaqarfimmi suliassanik tamanik suleqataassallutit.

Suliassat tassaanerupput ingerlatsinerni suliassat aalajangersimasut aamma assersuutigalugu EU-mut, ONR-imut, DANCEA-amut, Nunat Avannarliit aningaasaateqarfiinut, UArctic-ip allaffeqarfianut qinnuteqaatinik ikiuuttarnerit.

Tigussaanerusunik ilaatigut tullinnguuttut makku isumagisassavatit: 

  • Suliniutinut assigiinngitsunut aningaasatigut aqutsineq, soorlu illup iluanit avataaniilu aningaasalerneqarlutik ilisimatusarnikkut suliniutinut.
  • Missingersuusiornerit, nalunaarusiornerit aamma suleqatigisat assigiinngitsut oqaloqatigalugit ingerlaavartumik malinnaatitsinerit.
  • Nakkutilliinerit aamma avammut isumaqatigiissutissatut siunnersuusiornerit kiisalu isumaqatigiissutissanik takkussuuttunik misissuinerit, isumaqatigiissutissat tuluttut allaqqasut ilanngullugit.
  • Suliniutit illup iluanit avataaniillu aningaasalersorneqartut pillugit ilisimatusartunik ingerlatsinernullu aqutsisunik aalajangersimasumik amerlassusilinnut attaveqaataanerit.
  • Assersuutigalugu inatsisit tunngavigalugit isumaqatigiissutinik sivitsuinissanut aamma attaveqaatit eqqarsaatigalugit ajornartorsiutinik nukinginnartumik iluarsiiniarnerit, amerlanertigut Danmarkip Kunngeqarfiata avataaneersunik.
  • Piffissani ulapaarfiusuni allaffissornermi suliassat allat nukinginnartut.

Suliniutit pillugit aningaasaqarnermik, ilinniarnerit siusinnerusukkulluunniit atorfiit aqqutigalugit inatsisit tunngavigalugit isumaqatigiissutit eqqarsaatigalugit nunani tamalaani pissutsinik ilisimasaqareernissaq iluaqutaasinnaavoq.

Piginnaasat:

  • Kanditatitut suliatigut attuumassuteqartumik ilinniagaqarputit. Ilinniakkaminnik naammassinneqqammersut aamma eqqarsaatigineqarsinnaapput.  
  • Kisitsisinik inunnillu tamatigoortumik, nunani tamalaani suliniaqatigiiffinnilu ilisimasaqarluarputit.
  • Ilinniakkannit imaluunniit siusinnerusukkut atorfeqarsimaninnit inatsisit tunngavigalugit isumaqatigiissutinik misilittagaqarputit.
  • Ineriartortitsinermik suliaqarnissamik soqutiginnipputit aamma nunanit allamiut allallu suleqatigerusuppatit.
  • Sulininni namminersorsinnaavutit, kiffaanngissuseqarlutit akisussaaffeqarlutillu sulininni nammineerlutik aalajangiisinnaavutit.
  • Sapiissuseqassaatit tamatigoortuullutillu aamma suliaqarnissat annilaangagissanngilat – aamma suliat sungiusimasat, toqqortuinerit, oqarasuaammik isumaginninnerit il.il. eqqarsaatigalugit.

Tuluttut oqalussinnaallutillu allassinnaavutit. Naalagaaffinni Peqatigiinni FN-imi oqaatsinik allanik ilisimasaqaruit iluaqutaassaaq.

 

Qinnuteqaateqarnissamut killissarititaasoq tassaavoq 2018-imi novembarip ulluisa 15-iat

 

Akissaatit atorfinitsitaanermilu atugassarititaasut:

Akissaatit atorfinitsitaanermilu atugassarititaasut – tassunga ilanngullugit atorfinikkiartorluni soraarnermilu angalanerit pequtillu nassiunneqarnerat atorfininnerup nalaani Naalakkersuisunik aamma qinnuteqaateqartup kattuffiata isumaqatigiissutaat atuuttut naapertorlugit akilerneqassapput.
Suliffik sapaatit akunneranut nal. ak. 40-ni suliffiuvoq.

Ineqarneq:

Atorfimmut tunngatillugu sulisunut inissiamik pequtitaqanngitsumik malittarisassat atuuttut malillugit neqerooruteqartoqarsinnaavoq. Ineqarnermut akiliutit qularnaveeqqutillu inissiamut innersuunneqartumut tunngatillugu malittarisassat sukkulluunniit atuuttut malillugit akilerneqartassapput. Sulisunut inissiaq atorfimmit soraarnermi qimanneqassaaq.

Ineqarnermut akiliutit inissiallu qanoq ittuunera, nutaanngitsiginera aamma piginnittunut tunngasut apeqqutaatillugit assigiinngissitaarsinnaapput. Sulisunut inissiamut innersuunneqartumut piffissami utaqqisoqarsinnaassaaq, taamaattumik utaqqiisaasumik inissiamut inissiisoqarsinnaavoq, tassunga ilanngullugu najugaqatigiiffimmut imaluunniit akunnittarfiup inissiaataanut, tamakkulu akileraarutaasussaapput.

Nittartakkatsinni www.natur.gl-imi Pinngortitaleriffimmi suliassat annertunerusumik paasisaqarfigisinnaavatit aamma allaffissornermi pisortaq, Kathrine Lund Olsenip oqarasuaatikkut 36 12 00-ikkut attaveqarfigineratigut suliassat annertunerusumik paasisaqarfigisinnaavatit.

Qinnuteqaatit ilinniagaqarnermut uppernarsaatinik, siusinnerusukkut suliarisimasat pillugit oqaaseqaatinik aamma inaarutaasumik misilitsinnermit papilissat assilineqarnerannik ilallugu Pinngortitaleriffimmut nassiussinnaavat. Qinnuteqaat uunga nassiunneqassaaq: ”att. Administrationschef ”, Pinngortitaleriffik, Boks 570, DK-3900 Nuuk.

<- Uterit