Pisat nalunaarutiginissaat eqqaamajuk

29.07.11

Allattoq:  Katrine Raundrup

Pinngortitaleriffiup 2011-mut inassuteqaateqarnermini Akia-Maniitsoq aamma Kangerlussuup tuttoqarfiini Kangerlussuarmilu umimmaat killilersugaanngitsumik piniarneqarnissaat inassutigaa aavariarlutillu umimmanniartussat tamaasa ilungersorumik qinnuigalugit pisatik nalunaarutigisaqqullugit.

Killilersugaanngitsumik tuttut piniarneqassapput

2010-mi tuttoqatigiinnik kisitsinerup naliliinerullu takutippaa  merisassaqarneranut naleqqiullugu suli tuttorpassuaqartoq. Peqatigitillugulu pisanik Piniareq-kut nalunaarutit takutippaat tuttutarineqarsimasut Kangerlussuup- Sisimiut aamma Akia-Maniitsoq-p tuttoqarfiini (Piniarfissaq 2 aamma 3)  tuttoqarfiini tuttunut naleqqiullugit pisaasimasut ikippalaartut. Taamaattumik Pinngortitaleriffiup inassutigeqqippaa ammasumik (killilersugaanngitsumik) aavarneq ingerlaannassasoq – aamma Nuup kujataata aaffaani, 2006-imi iluatsittumik tuttui ikilinneqarsimasuni ilisimatuunit nerisassaannut naleqqiullugit naammattunngorlugit. Tuttut pitsaasumik kulavannut angutivissanullu avissimanerat pitsaasuussaguni arnavissat pisaasut 50 %-ii sinnerlugit amerlassuseqartariaqassapput. Ukiuuneranili aavarnermi kulavaat norrisartut pisarinissaat naleqquttuunngilaq.

Kangerlussuarmi umimmappassuit

2010-mi umimmannik kisitsinermi paasinarsivoq Kangerlussuarmi nerisassaannut naleqqiullugit umimmaqarpallaartoq. Taamaattumik Pinngortitaleriffiup inassutigaa ammasumik, killilersugaanngitsumik umimmanniarneq ukiumi tullermi ingerlaannassasoq. Umimmanniat inanneqarput angutivissat arnavissallu pisariniaqqullugit angutivissanut arnavissanullu pissusiusumik avissimanerat pigiinnarniarlugu aammalu kingornutassamikkut ajunngitsooqqulugit.

Ikiortigut uumasoqatigiinnut tunngatillugu paasissutissanik pissarsiniarnitsinni

Umimmattanut tuttutanullu tunngatillugu pisanik nalunaarutaasartut ukiuni kingulerni malunnartumik ikiliartorsimapput. Aallaaniat pisamik suiaanerinik, utoqqaassusiannik, tunnoqarnerannik aammalu sumi pisaasimanerannik nalunaarutaat pingaartuullutillu pinngitsoorneqarsinnaanngillat ilisimatuut uumasoqatigiit qanoq innerinik nalilersuisinnaassappata.  Taamaattumik Pinngortitaleriffiup ilungersortumik aavartartut tamaasa pisanik nalunaarutiminnik  aavarneq naammassippat kommuniminnut tunniusseqqullugit qinnuigai.

Tuttunut umimmannullu inassuteqaat takusinnaavat uani: www.natur.gl/biologisk-raadgivning/landpattedyr/

Annertunerusumik paasisaqarumagaanni ilisimatooq Josephine Nymand attavigineqarsinnaavoq tlf. 36 12 34 imaluunniit afdelingschef Fernando Ugarte tlf. 36 12 00 atorlugu.

<- Uterit

Pisat nalunaarutiginissaat eqqaamajuk. Assiliisoq: Fernando Ugarte

Pisat nalunaarutiginissaat eqqaamajuk. Ass.: Fernando Ugarte