Qassutit annaasat sunik pisaqartarpat?

Spøgelsesgarninik taasagaat tassaapput qassutit pinngortitamut qimaannarneqarsimallutilluunniit annaaneqarsimasut immaqalu ilimagisatsinnit amerlanerusunik uumasunik pisaqartartut.

Pinngortitaleriffik spøgelsesgarn-it, sakkuutit annaasat, qassutaarsinerit, paasisitsiniaanerilluunniit pillugit ilisimatinneqakulavallaanngilaq. Taamaattumik nalunarpoq uumasut qanoq amerlatigisut taamaalillutik toqusarnersut. Taamatut toqusoqartarnera peqassutsunik nalilersuinerni ilanngunneqartanngilaq, nalinginnaasumik toqusartut aammalu piniarnikkut aalisarnikkullu pisarineqartartut kisimik naatsorsorneqartarmata.

 

Piffissarujussuaq atorlugu qassutit pinngortitami nungukkiartuaartarput. Qassutit immap naqqaniikkunik qaamanermit sunnerneqarsinnaasanngillat taamaattumillu kigaatsuararsuarmik nungullariartuaartarput. Qassutit immap naqqaniittut ukiut 600-illuunniit qaangiukkaangata aatsaat malunnarunnaarlutik nungussinnaasarput. Qeqqussanilli, ujaqqanit marullummillu qallerneqartarput.

-Ukioq manna angallat saarullinniut atorlugu Kangerluarsunnguami misissuitilluta puisimik qassutitsinnut napittoqarpoq ilanngullugulu aamma spøgelsesgarn-inut napitilluni. Puisimillu asiusimasumik pisoqqamik allamik aamma spøgelsesgarn-iniittoqarluni. Qassutit Pinngortitaleriffimmut tikiukkatsigit misissoqqissaarneqarput. 60 meterinik takissuteqarput, tassaniipput mitit 18-it saanikui, aalisakkat marluk saattuarpassuillu, ilisimatusartoq Rasmus Nygaard nassuiaavoq.

Mitit puisituulli qassutinut napitillutik ipinikuusimapput.  Uumasut qangali napitinnikuusimapput, tassami saanikuinnanngorsimapput.

 

-Ilaanneeriarluta sakkuutinik katanneqarsimasunik pinngortitami nassaartarpugut eqqoriaruminaapporli qassutit qanoq amerlatigisut sumi tamaniinnersut tamakkulu uumasunut qanoq kinguneqartarnersut. Aalisartorpassuit qassutit pinngortitami annaaneqarsimasut eqqartorumasanngilaat. Qassutaarsertarneq eqqartorumaneqarpallaartarunanngilaq”, Rasmus Nygaard oqaluttuarpoq.

Uumasut qassutinut napitillutik pinngortitamulluunniit igiinnakkanik allanik peqquteqarlutik toqugaangata inuiaqatigiit, aalisartut pinngortitarlu annaasaqartarput, taamaalillutik uumasut tamakku pinngortitap peqassusianut ilanngaataasarmata. Ilimagisamiillu akulikinnerusumik taamatut pisoqartarunarpoq.

”Peqassuseq eqqarsaatigalugu tamanna ajornartorsiutaavoq, naatsorsoruminaapporli uumasut qanoq amerlatigisut taamatut toqusarnersut. Tamanna uumasut nerisareqatigiinnerisa pisarineqartarnerisalu saniatigut aamma toqussutaasarpoq. Toqussutaasartut ilaat”, Rasmus Nygaard oqaluttuarpoq.

Qassutit pinngortitamut puigukkat amerlasuutigut quaajaatinik qeqqussanillu qallerneqartarput, sumiiffiannili aalisartoqaraangat nunamut qaqinneqarlutik saqqumiinnalersarlutik. Taamaalillutillu uumasunik pisaqaqqittoortalersarlutik.

Pinngortitamut igitat pissutigalugit uumasunik toqusoqartarnera millisarneqarsinnaavoq inuit igitassaatiminnik angerlaassisarnerisigut ajutoorsimanerminnilluunniit imaluunniit qassutiminnik annaasaqarsimanerminnik nalunaarutiginnittarnerisigut. Sakkuutinik annaasaqarsimaguit spøgelsesgarninilluunniit ilisimasaqaguit tusarfigerusussavatsigit. Pinngortitaleriffimmut allagit uunga info@natur.gl imaluunniit rany@natur.gl

 

 

 

 

<- Uterit

[Translate to Kalaallisut:] Mitit 18-it saarngi aajukua

Qassutit annaasimasat 60 meterisut takitigisut