Silap pissusia pillugu ulloqartitsineq: Silap pissusianik Ilisimatusarfik nalliuttorsiorpoq

12.02.19

Silap Pissusianik Ilisimatusarfik 2019-imi ukiunik qulinngortorsiorpoq. Tamanna ukiup ingerlanerani nalliuttorsiorfiussaaq ilisimatusarnermik saqqummiussinernillu assigiinngitsunik sammisaqartitsiffiussalluni. Nalliuttorsiutiginninneq arfininngornermi februarip 16-iani aallartinneqassaaq, Silap Pissusianik Ilisimatusarfik Kalaallit Nunaanni Silap pissusia pillugu ulloqartitsissaaq assigiin-ngitsunik sammisaqartitsisoqarlunilu saqqummiisoqaqattaarfiusumik. Ilisimatusartut, eqqumiit-suliortut naalakkersuisoqarfimmeersullu, tamarmik silap pissusiata allanngoriartorneranut tunngasunik suliaqartuneersut, naapinneqarsinnaajumaarput. Aaqqissuussaq annertuumik soqutigilluarneqarmat akisussaasuusut assut nuannaarput

- Silap pissusia pillugu ulloqartitsinitsinnut soqutiginnittoqarluarnera assut nuannersumik tupaallaatigaara. Silap Pissusianik Ilisimatusarfimmi aqutsisoq Malene Simon oqarpoq.

Aaqqissukkami peqataasussat ilai tassaapput, Asiaq, Nunatta Katersugaasivia, KNAPK, Dronning Ingridip peqqissaavia, Pinngortitamut, Avatangiisinut Ilisimatusarnermullu immikkoortortaq, NASA, Ilisimatusarfik, GEUS aamma Pinngortitaleriffik.

Klima Elvis

Sammisassaqartitsinermittaarlu meeqqanut inersimasunullu aliikkusersuisoqassaaq. Meeqqanit nuannarineqarluartoq Hinnarik najuutissaaq, alutornarluinnartorlu Josh Willis, Klima Elvisitut ilisimaneqarnerusoq, aliikkusersuissalluni. Taanna ulluinnarni NASA-mi ilisimatusarnermut tunngasuni aqutsisuuvoq, saniatigullu Elvis Presleyusaartartuulluni. Soqutigisanilu akulerullugit silap pissusia pillugu taalliaminik Elviserpalaarluni erinarsorluni takutitsisartuuvoq.

Ullup ingerlanerani silap pissusia pillugu saqqummiinerit arlaqartut ingerlanneqassapput, ilaatigut kalaallit nerisassaataanni tappiorannartut imaluunniit silap pissusiata allanngorarnera pillugu piniar-tut aalisartullu ilisimasaannut tunngasunik saqqummiisoqassalluni. Saqqummiinerit assigiinngitsut 13-it kalaallisut, qalluunaatut tuluttullu ingerlanneqassapput, nutserisoqarumaarporlu.

Assilissat eqqumiitsuliallu

Eqqumiitsuliortup Naja Rosing-Asvidip eqqakkat atorlugit ilusilersugai kikkunnit tamanit alakkarneqarsinnaajumaarput, Pinngortitaleriffimmilu miluumasunut timmissanullu immikkoortoqarfiani pisortap, Fernando Ugartep misissuiartortilluni assilisimasai kusanarluinnartut saqqummersinneqassallutik.

Atisaliortartup Bibi Chemnitzip Silap Pissusianik Ilisimatusarfik aamma piniartorsuit suleqatigalugit ilisimatusarfiup tujuuluarartai nasartailu nutaat sanavai. Taakkulu ullorsiortitsinermi takuteqqaarneqassapput, silallu pissusianut tunngasunik nalorsittaarinermi ajugaasunit pinnanneqarsinnaajumaarlutik.

Aaqqissugaq arfininngornermi februarip 16-iani nal.10-mit nal.16-ip tungaanut, Katuap inersuani piumaarpoq.

Ullormi pisussanut pilersaarut kakkiuteqqavoq, pisussallu pillugit annerusumik www.GCRC.gl-imi /www.natur.gl-imi aamma Pinngortitaleriffiup Facebookiani atuartoqarsinnaavoq.

Annerusumik paasisaqarniaraanni attavissaq:

Malene Simon 54 89 77 imal. mail: masi@natur.gl

<- Uterit