Silap pissusiata allanngoriartorneranut sillimmartaaqatigiittariaqarpugut

Ilisimatusartut Canadameersut, Kalaallit Nunaanneersut Danmarkimeersullu Kalaallit Nunaanni siunissami unammilligassat pillugit misissuisimapput. Silap kiannerulernerata kingunerisaanik allannguutit qanoq iliuuseqarfigisineqarsinnaanerat pillugit ilisimatusartut siunnersuutitsialaasinnaasunik saqqummiussuiniarput. Tamakku Nuummi Pinngortitaleriffimmi innuttaasunik ataatsimiititsinermi paasisaqarfigineqarsinnaassapput.

10.09.18

Issittumi Siunnersuisoqatigiit nalunaarusiamik saqqummersitseqqammerpoq taaguuserneqarsimasumik "Adaptation Actions for a Changing Arctic - Baffin Bay and Davis Strait Region", Kalaallit Nunaata kitaanut Canadallu kangianut nunallu taakkua akornganni imartanut tunngassutilimmik.

Silamut tunngatillugu nunani taakkunani unammilligassat massakkut siunissamilu atuutilertussat qanoq naleqqussarfigalugillu iliuuseqarfigineqarsinnaanerat ilisimatusartartunit innersuussuteqarfigineqarput.

Umiarsuit angalanerulernissaat, pinigassatigut periarfissat allanngortut, takornariat amerlinissaat, silarlukkajunnerulernerata kingunerisaanik perlataarnerit uumasullu allaneersut takkusuutilernissaat allaaserineqarput. Tamakkuupput Kalaallit Nunaanni siunissami atugarilerneqarsinnaasut unamminartorsiortitsisinnaasullu taakkartorneqartut ilaannaat.

Nuummi siunissaq pillugu innuttaasunik ataatsimiititsineq

Ilisimatusartartut suliami peqataasimasut sapaatip akunnerata tulllini Nuummi Pinngortitaleriffimmi ataatsimiititsiniarput 11. septembari aallartittussamik. Tassani sammineqassapput Kalaallit Nunaata siunissami silap pissusianit allanngoriartortuartumit sunnigaanerata kinguneri aammalu taamaattoqarnerata nunarsuaq tamakkerlugu nunatsinnilu aningaasarsiornikkut sunniutaannut tunngassuteqartut.

 

”Siunissaq isigimaniarlugulusooq sulinerput ingerlassimavarput inuiaqatigiittullu unammilligassatsinnut qanoq iliorluta sillimmartaarniarsinnaanerput innersuussuteqarfiginiarsimallutigu. Taamaalilluta unammilligassavut mianersorfissavullu piareersimaffigisinnaaniassagatsigit”, nalunaarusiami allaqataasoq Pinngortitaleriffimmilu Silap Pissusianik Ilisimatusarfimmi pisortaasoq Malene Simon oqarpoq.

 

Nalunaarusiami naggasiutaasut innersuussutillu pillugit ilisimatusartartut innuttaasunuttaaq apuussaqarusupput, taamaattumik Nuummi innuttaasut periarfissineqassapput ataatsimiititsinermut marlunngorpat 11. september nal. 19-21 peqataanissamut.

 

Innuttaasunik ataatsimiititsinermi ilisimatusartartut naatsunnguakkuutaartumik saqqummiussaqartassapput ilaatigut piujuartitsiniarnermik tunngaveqartumik aalisarnerit, pisuussutinik uumassusilinnik allatut atorluaasoqarsinnaaneranik periarfissat ilaatigut takornariaqarnermut attuumassuteqartut tikinneqassallutik, soorlu aamma atortulersuutitigut inissinillu peqqissutsimut iluaqutaanerusussanut attuumassuteqartut, taamatullu aatsitassarsiornikkut takornariaqarnermilu umiarsuartigut angallannerit nutaanik periarfissiissuteqarnerulernissaat avatangiisitigullu unammilligassartai ilanngullugit oqallisigineqassapput.

 

”Neriuppugut amerlasuut takkukkumaartut ullumikkut aaliangigassatta siunissamut kingunerisinnaasa oqallisigineqarnissaanni”, Malene Simon oqarpoq.

Innuttaasunik ataatsimiititsinissamut kikkut tamarmik tikillluaqqusaapput, nalunaaqqaarsimasoqartariaqanngilaq. Ataatsimiinneq qallunaatuumiit kalaallisuumut toqqaannartumik nutserneqassaaq.

<- Uterit