Sisimiuni Sanna-mi oqalliffiusumik ataatsimiinneq

05.06.12

Allattoq:  Kitte

Pinngortitaleriffiup pingasunngornermi 6. juni nal. 15-17 saattuat saarulliillu pillugit oqalliffiusumik R/V Sanna- mi ataatsimiinnissamut  SAPP aggersarpaa.  Ataatsimiinneq ilaatigut Pinngortitaleriffiup Sisimiut eqqaani saattuanik saarulleeqqanillu misissuineranut tunngatillugu ilisimatitsiffiussaaq aammalu siunissami suleqatigiinnissaq oqallisigineqassalluni.

Pinngortitaleriffiup makkua aalisarfigai: Nassuttooq, Amerloq, Ikertooq, Qeqertalik, Kangerluarsuk, Itilleq aammalu kangerluit sioraanni killeqarfiup iluani aammalu Hosteinsborg Dyb-i.

Pullatit, qassutit qamutaasallu (bundtrawl) atortoralugit aalisarniarpugut.  Ilanngullugulu Seabird sensorit (kissassutsimut, tarajoqassutsimut peqassutsimullu uuttortaatit) Ikertuumi Itillimilu immap naqqaniititagut taarserniarpagut.

Sisimiuni kommunalbestyrelsemut ilaasortattaaq ullaap tungaani SANNA-mik takornarniartitsinissamut aggersarneqarput.

Sanna tamanut Sisimiuni ammatinneqassaaq 20. juni nal. 15 -18.

Umiarsuartaaq Sarfannguami, Itillimi, Aasianni, Qasigiannguani Qeqertarsuarmilu tamanut takornariarneqarnissamut ammatinneqarumaarpoq aasap ingerlanerani misissuilluni angalanerup nalaani. Qaqugu tamatuma pinissaa allagartaliinikkut illoqarfinni/nunaqarfinni allagarsiivitsigut ilisimatitsissutigineqartarumaarpoq. 

19. juli ualikkut Qeqertarsuup Tunuani timmissanik kisitsinerit pillugit oqalugiartoqassaaq, qaleralinnut tunngatillugu siunnersuineq aammalu angallatip Sanna-p Ilulissani takornariartinneqarnissaa pillugit ilisimatitsineqartoqarumaarluni.

 

<- Uterit

R/V Sanna angalermi aappassaani - Nuup kangerluani saarulleeqqanik kisitsineq. Ass.: Kitte Vinter-Jensen

Aalisartut naapitagut tamarmik aperisarpagut pisaminnik uuttortaasarsinnaannginnersut. Ass.: Kitte Vinter-Jensen