Tunumi qaleralikilliartortuarsinnarpoq saarulliillu suli ikippallaaqaat

25.08.10

Allattoq:  Kitte

Tusagassiuutitigut nalunaarut:

Tunup Islandillu akornisa imartaani qalerallit aalisarneqartorujussuupput. 2011-imi qaleralittassiissutit allanngoratik 5.000 tonsioqqinnissaat biologinit siunnersuutigineqarpoq. 2009-mi qaleralittarineqartut tamakkerlutik (Islandimiut kalaallillu pisaat) 28.000 tonsiupput. Sumiiffimmi qalerallit Islandimit nunatsinnillu ataatsimut pigineqarput. Biologinit siunnersuutigineqartut sinnerujussuarlugit ukiorpassuarni qalerallit pisarineqartarsimapput taamaattumillu  nunat marluk taakku akornanni qaleralittassiissutit qanoq agguataarneqartarnissaat aqunneqarnissaallu pillugit isumaqatigiissuteqartoqassasoq biologinit siunnersuutigineqarpoq.

Saarulliit

Saarulliit allisinnaassappata 2011-mi saarullinniartoqannginnissaa biologinit siunnersuutigineqaqqippoq. Sinerissap avataani saarulleqarpianngitsoq biologit misissuinerisa takutippaat. Sinerissamut qanittumi avataanilu saarulliit ukioqatigiikkuutaat ikittuinnaapput. Saarulliit tukertut amerlanersaat 2003 aamma 2005-imi tukertuupput. Saarulliit suffisartut amerlanerulinngippata ukioqatigiikkuutaallu amerlanerulinngippata saarulleqassutsimut tunngatillugu biologit neriuuteqarpallaanngillat. 2007, 2008 aamma 2009-mi saarullittarineqartut 16.000, 25.000 aamma 13.000 tonsiusimapput. 2010-imi 10.000 tonsit pisassiissutigineqarput taamaattumillu ukioq´manna pisarineqartut ikilinissaat naatsorsuutigineqarpoq.

Qalerallit Qeqertarsuup Tunua aamma Uummannaq

Qeqertarsuup Tunuani 2001-ip kingorna qalerallit 10 cm-imik milleriarsimapput 2004-milu pisarineqartut 13.000 tonsioriarlutik 2009-mi 6.300 tonsinut ikileriarsimapput. Biologit misissuinerisa ilimanarsisippaat aalisakkat mikisut nutaat aalisarneqalersimasut taamaattumillu 2011-imi amerlanerpaanik 8.000 tonsinik pisassiisoqarnissaa siunnersuutigineqarpoq. Uummannami pisarineqartartut amerlassusaat nikippiassanatik 2002-miilli ukiumut 5.000 tonsiusarsimapput biologillu misissuinerisa ilimanarsisippaat qalerallit ikiliartunngitsut taamaattumillu 5.000 tonsinik pisassiisoqarnissaa siunnersuutigineqarpoq.

Paasisaqarnerujumaguit attavigikkit:

Helle Siegstad, Immikkoortortaqarfimmi pisortaq

36 12 00 imaluunniit mailikkut: hesi@remove-this.natur.gl

<- Uterit

Ilulissani 2007-mi qaleralinnik ningittarsorneq. Pinngortitaleriffiup assiutaata toqqorsivianiik. Ass:Carsten Egevang