Tunup imartaa ukiormanna siornamut sanilliullugu avaleraasartuukinneruvoq

Tunup imartaani avaleraasartooqassutsimik misissuinerit ullumikkut naammassissapput. Misissuinernit inernerugallartut takutippaat Tunup imartaa tamarmi Dornh Bankemiit kujammut Nunap Isua qaangerlugu avaleraasartooqartoq; kisiannili siornamut naleqqiullugu avaleraasartuut ikinnerunerat maluginiarneqarpoq.

10.08.15

Allattoq:  PeMi

Nunatta imartaani avaleraasartuukinneruunera (assiliartaliussaq takuuk) imaassinnaavoq Tuluit qeqertaasa kitaatungaanni suffisarfimminniit avannamut kimmut ingerlaalersarnerisa upernaarmanna immap nillerpallaarsimaneranik peqquteqartumik kinguaattoorsimaneranik peqquteqarsinnaasoq. Tamatuma saniatigut ilimagineqarpoq avaleraasartooqassutsip tarmarmiusup appariaateqalaarsimasinnaanera. Taamaattoqarsimasinnaaneranik ilimagisaqarneq Nunatsinneersut avaleraasartoorniartartut ukiormanna misigisaannut naapertuuppoq, taakkumi juulimi qaammammilu matumani kingusinaarnerullutik piisatsitsinerusarlutillu aalisarnerminnik ilisimatitsisarnerinut naapertuupput. 

Pinngortitaleriffimmeersut islandimiut ilisimatusaatigalugu misissuutaannik Arni Fridriksson-imik aammalu kilisaataannik Birtingur-imik attartartorlutik Nunatta imartaani misissuititsipput. Kisiannili kilisaat Birtingur misissueqataaniarluni avalalaaginnarluni motoorerliulerluni misissueqataasinnaajunnaarluni uniinnarpoq. Naak ullut misissuiffiusussat amerlagisassaanngikkaluartut taamaattoq biologit misissuut Arni Fridriksson atorlugu misissorniakkaminnik tamanik naammassinnipput.

Nunatsinneersut avaleraasartuunik misissuiitigalutik arfernik aammalu tappiorannartukkunnik misissuinernik aamma ingerlatsiitigipput, misissuinerillu tamarmik norskit, savalimmiut aamma islandimiut peqatigisaanik imartaminni misissuinerinut ataqatigiissarneqarput. Nunanit taakkuanngaanneersut biologit misissuinernit paasissutissaatinik katersanik ulluni makkunani suliarinneqqiileruttorput, tamakkulu suliaat Imaani Ilisimatusarnerit pillugit ataatsimiititaliap ilisimatuussutsikkut suleqatigiissitaani aggustip 18-ianiit 20. aggusti 2015 tikillugu ataatsimiinnissaannut saqqummiussorneqarlutik nalilersorneqassapput.

Tunup imartaaniit avaleraasartooqassutsimik uuttortaanerit Atlantikup Avannarliup imartaani avaleraasartooqassutsimik tamarmiusumik nunat tamalaat nalilersuinissaanni ilanngunneqartussaapput.

Nalilersuinissani taakkunani ilisimatusartartut Pinngortitaleriffimmeersut naatsorsuinertaanni pingaarutilimmik peqataatinneqartussaapput. ICES´ip ataani pisassiissutigineqarsinnaasutut innersuussutissat 2016-imoortut oktoberip aallartisimalernerani saqqummunneqartussaapput.

Avaleraasartooqassutsimik misissuinernit paasissutissat pissarsiarineqartut Nunatta qanoq annertutigisumik Atlantikup Avannarliup avaleraasartooqatigiivinit pisassinneqarnissamik piumasaqaateqarsinnaatitaaneranut aalajangiisuulluinnartussaapput.

Avaleraasartuut tappiorannartutorniarlutik nunat avannaamioqatigiit imartaat, matumunnga Nunatta imartaa ilanngullugu, aasaanerani illuarfigisarpaat. Ukiisarfii suffisarfiilu pingaartumik Tuluit qeqertaasa kitaatungaanniikkajuttarput. Biologit misissuisarnerinit ukiumi pineqartumi aasaanerani avaleraasartoorniartarnerit qanoq ingerlasinnaanerinik takussutissiiaartalersinnaanissanut atorneqartalernissaat neriuutigineqarpoq.

 

Itinerusumik paasisaqarusunnermi saaffigisassaq:

Aalisakkanut Qalerualinnullu Immikkoortortaqarfimmi ilisimatusartartoq Teunis Jansen oqarasuaat +45 61308828 imal. mail: teja@natur.gl

<- Uterit

Ass. 1: Avaleraasartuut pisaasartut (nal. ak. affaani kalinnermi kiilumut pisat) aammalu Nunatta Islandillu imartaanni peqassutsimik misissuiffigalugit umiarsuit misissuutits ingerlaarfii. Ammalortut pisat amerlassu-siannik takussutissiipput, krydsillu tassaapput kalinnerigaluit pisaarfiusimanngitsut.