Umiarsuaq ilisimatuussutsikkut misissuutissaq

Pinngortitaleriffik Spaniamiut umiarsuarliorfiannik Balenciagamik isumaqatigiissuteqaqqammerpoq umiarsuarmik ilisimatuussutsikkut misissuutissamik nutaamik sananissamik. Nutaamik umiarsualiorsinnaanissaq piviusunngorsinnaalerpoq Namminersorlutik Oqartussat aammalu aningaasaateqarfiup Aage V. Jensens Fonde-illu katillugit 235 mio. koruuninik aningaasaliissuteqarnerisigut.

 

Kilisaat ilisimatuussutsikkut misissuutissaq nutaaq 61 meterinik takissuseqassaaq sikusiorsinnaanissamullu immikkut qajannaarsagaassalluni. Misissuutissaq norskit suliffeqarfiutaannit Skipstekniskimit titartarneqarsimavoq, soorlu nunatsinni kilisaaterpassuit assigalugit issittup imartaani angallatigineqartussanik ilusilersuinernik suliffeqarfik misilittagaqarluarpoq. Nunanit tamalaanit peqataaffigineqartumik suliariumannittussarsiuussisoqarnerani Balenciaga-kkormiut ajugaapput, taakkulu nunatsinneersunik arlalissuarnik sullissisareerput soorlu Royal Greenlandip kilisaataanik, Royal Arctic Linep allallu maani umiarsuaatileqatigiiffiit ukiuni kingulliunerusuni sannannikuusarsimagamikkit.

 

Umiarsuaq misissuutissaq nutaaq Pinngortitaleriffiup ukiorpanngortuni misissuutigisimasaanik ”Paamiut”-mik taarsiissaaq, nutaalianillu atortulersugaanissani peqqutigalugu misissuinernik nutaanik ilisimatusaatinillu allanik suliaqarsinnaalissalluni. Qalut kivisittakkat atorlugit aalisakkanik misissuinerit (raajat, qalerallit saarulliillu) aammalu aalisakkanik immap ikeraniittartunik (avaleraasartuut allallu) misissuisarnernik ingerlatsisoqarsinnaalissaaq. Taamatut nutaaliat allat kivisillugit nipilu atorlugu misissuisarnernik aamma ingerlatsisoqarsinnaalissaaq, taamaalilluni soorlu ammassannik aalisakkanillu immap ikeraniittartunik aamma misissuisoqarsinnaalissalluni.

Umiarsuaq atortorissaartorujussuusussaq inunnut 32-nut ilaaffigineqarsinnaanngorlugu suliarineqassaaq. Taamaalilluni ilisimatusaatinik ataatsikkut arlalinnik suliaqarsinnaanerit pisinnaalissapput, piffissamillu atuilluarnerusoqarsinnaalissaaq. Aamma umiarsuaq ilinniartitsivittut atorneqarsinnaassaaq, taamaalilluni Imarsiornermik Ilinniarfimmeersut sungiusaatigalugu ilaaffigisinnaalissallugu.

 

Umiarsuup misissuutissap nutaap sananeqarnissaanut peqqutaasut pingaarnersaraat Pinngortitaleriffiup Kalaallit Nunaani pisuussutit uumassusillit pillugit piujuartitsiniarnermik tunngaveqartumik iluaqutigineqarnissaannik siunnersuisarnerminut misissuisarnernik toqqammaviusartunik ingerlataqaannarnissaata qulakkeerneqarnissaa. Umiarsuartaassap angissusia, aaqqissuunneqarnera nutaalianillu atortoqartussaanera eqqarsaatigalugit aalisakkanik peqarfiit avannarpasinnerusut misissuivigineqartalernissaat anguneqarsinnaalissaaq soorlu aamma aalisarfiit nutaat ujartorneqarsinnaanissaat pisinnaalissasoq. Misissuutissaq nutaaq Pinngortitaleriffiup suliassanik pilersaarutaanut 2021-miit upenarneraniit atorneqarsinnaalernissaa pilersaarutaavoq.

 

Pinngortitaleriffimmiit suliamut taama aningaasartaqartigisumut naalakkersuinikkut tapersersuinerujussuaq nuannaarutigineqaqaaq. Taamaalilluni Pinngortitaleriffiup ullutsinnut naleqquttumik atortorissaaruterpassuisa pinngortitamik ilisimatusartarnerit siunnersuisarnerillu ingerlanneqarnerannik toqqammaviliisuullutik suli ukiorpassuarni ingerlanneqartuaannarnissaannik qulakkeerisoqarpoq.

 

 

 

 

Itinerusumik paasisaqarusunnermi saaffigisassaq:

 

Pisortaq Klaus Nygaard oqarasuaat 361200 imal., nygaard@natur.gl

<- Uterit