USA-mi Master of GIS-inngortoq

Melisa L. Platson, Sisimiuneersoq, tallimanngormat maajip pingajuani, University of Minnesotami ilinniakkaminik naammassivoq, taamaalilluni imminut taasinnaanngorluni Master of Science in Geographic Information Systems.

Melisa Danmarks Tekniske Universitetimi, Lyngbymi Sisimiunilu ingerlallugu, Arktisk Ingeniøritut naammassimmat ilinniakkani University of Minnesotami ingerlateqqissinnaagai National Science Foundationimit akiliukkumaneqarluni neqeroorfigitippoq.

Sisimiuni Minnesotamilu ilinniartuutilluni Polar Geospatial Centerimi Minnesotamiittumi, Nuummilu Asiaq Greenland Survey-imi Pinngortitaleriffimmilu ilinniartutut sulisimavoq. Tamaanilu satellitsimik assilisanik suliaqarsimavoq nunatsinnut iluaqutaasumik, ilaatigut nunatta kujataata-kangisissuata sineriaa paasissutissanik ilanngussuiffigisimavaa, imeqarfiit uuttortaavigalugit satellitsimillu assilisanik aarrit nakkutigisimallugit.

Polar Geospatial Centerimi ilaatigut ArcticDEM-imik suliarinneqataasimavoq. ArcticDEM tassaavoq, issittoq tamakkerlugu nunap ilusaanik 3D-nngorlugu digitalimik, erseqqilluinnartumik assilialiaq, taannalu USA-meersumit National Science Foundationimit aamma National Geospatial Agencymit aningaasaliiffigineqarsimavoq. Assilialiaq silap pissusianik ilisimatusarnermi qaqqallu sisoornerannik, soorlu 2017-imi Nuugaatsiami pisumi, misissuinerni atorneqarsinnaavoq. Pinngortitaleriffiullu tuttut sumiiffiinut atortarpaat.

 

 

 

<- Uterit

Melisa L. Platson aamma Paul Morin, Polar Geospatial Centerimi aqutsisoq.