Umimmak

Umimmaat Kitaani Kangerlussuup eqqaani sivinganermi aputitarasaartumiittut. Assiliisoq: Carsten Egevang
Umimmaat Kitaani Kangerlussuup eqqaani sivinganermi aputitarasaartumiittut. Assiliisoq: Carsten Egevang
Kitaani Kangerlussuup eqqaani umimmaat. Assiliisoq: Carsten Egevang
Kitaani Kangerlussuup eqqaani umimmaat. Assiliisoq: Carsten Egevang

Ovibos moschatus

Umimmak savamut ussimmullu assingusoq tamugartortuuvoq. Siggua savatulli meqqoqarpoq. Nassui ulamertuupput ussiullu nassuisulli manissuullutik silittorujussuupput. Umimmaat uumasunut miluumasunut ilaqutariinnut nassumminnik katatsineq ajortunut (Bovidae) ilaapput. Umimmaat savanit (Ovis) nersussuarnillu (Bos) akusaasoralugit sivisuumik ilimagineqarsimagaluarpoq. Tamannali eqqortuunngilaq uumasulli umimmannut qaninnerpaat tassaapput goral-it, Asiami uumasut savaasanut eqqaanartut. Umimmaat tuitik tikillugit 150 cm-isut portutigilersinnaapput. Angutivissat inersimasut 320 kiilut missaannik oqimaassuseqalersinnaapput arnavissallu 200 kiilunik oqimaatsigilersinnaallutik minnerupput.

Uumasut miluumasut nassumminnik katatsineq ajortut nassui atajuaannarput. Arnavissat angutivissallu tamarmik nassoqarput nassuisalu angissusiat malillugu piaqqat, inuusukaat inersimasullu imaluunniit suiaassusaat immikkoortinneqarsinnaapput. Arnavissat nassui nalinginnaasumik angutivissat nassuinit minnerusarput arnavissallu qaavini ataatsimut naaneq ajorlutik. Angutivissat nassui talliartortillutik qaavini ataatsimut katiguttarput. Angutivissat nuliarfiup nalaani arnavialerngusaallutik qaaminnik imminnut aportaattarput. Angutivissat imminnut aportaattut ungasiakkaamit tusaaneqarsinnaasarput.

Umimmaat Issittup ukiuanut illersuutigissaartorujussuupput. Meqquisa ilua´tungaaniipput qiviui taakkulu silataanni qernertunik torsusuunik meqqoqarput. Umimmaat qiviutik aasakkut katattarpaat.

Nerisaat

Umimmaat tamugartortuupput aammalu iviit, iviusat assigiinngitsut orpikkallu naaneri nerisaraat. Umimmaat nerisaannut aqqutaat nerisassanut tamakkununnga arrortikkuminaatsunut naleqqussagaapput. Tuttunut nerisaminnik immikkut toqqaasimasunut sanilliullugit umimmaat nerisaasa aqqutaat takinerupput. Taamaalillutik umimmaat nerisaat takinerusumik aqqusaagassaqartarput, taamaalillutillumi nerisaat inuussutissartaqarpallaanngitsut sunniuteqarluarnerusarput. Taamaattumilli aamma tuttunut sanilliullutik nerisaminnik sivisunerusumik tamuasarput (nerukkaqarput).

Piaqqiortarnerat

Umimmaat augustip naalerneranit oktobarip allartinneranut nuliusarput. Aasaanerani nuliarfiullu nalaani umimmaat ataatsimoortut tallimat qulit missaaniittarput angutiviartaallu ataasiinnaakkajunneq ajorput. Angutivissap arfinillit sinnerlugit ukiulik naalagaasarpoq taassumallu angutivissat nukarliunerusut naalagaaniartuunngitsullu ataatsimoortuni akuerisinnaasarpai. Arnavissat qaammatit qulingiluat missaanni naartoreeraangami apriilimi maajimiluunniit ataatsimik piaqqisarput, akuttusuumik marlulisarpoq. Kangerlussuup eqqaani siusinnerusukkut arnavissat ukiumut marloriarlutik piaqqisinnaasarput Tunumili umimmaat akuttunngitsumik ukioq allortarlugu piaqqisarlutik. Ukiuunerani umimmaat ataatsimoortut 50 - 60-t missaanniittut takornartaaneq ajorput.

Nutartigaq 01.04.2011