Gassit nunarsuarmik kissatsitsisartut aamma nunat imartallit sunniivigeqatigiittartullu pillugit ataatsimeersuarneq.
22.09.11
Silap Pissusianik Ilisimatusarfimmi sulisut ulluni 19. septembarimiit 22. septembarip tungaanut Nunarsuup avannaani gassit nunarsuarmik kissatsitsigaluttuinnartut aniatinneqartut aamma nunat imartallit tamakku pillugit sunniivigeqatigiittarnerat pillugit ataatsimeersuarnermut aggersaasuusimapput. Ataatsimeersuarneq EU-p ataani attaveqatigiit GREENCYCLES II-mik taaguuteqartup ataani ilisimatusartut sungiusaatigalugu attaveqaataattut taaneqartartup ilaatut aaqqissuunneqarpoq. Ataatsimeersuarnerli aamma International Arctic Science Committee-mit (IASC) tapiiffigineqarpoq. Tamatuma saniatigut ataatsimeersuarneq Nordiske Topforsknings Initiativ aamma DEFROST-ip ataani ”Centre of Excellence-p” ilagaa, tassanilu Silap Pissusianik Ilisimatusarfik timitaliilluni peqataavoq. Ataatsimeersuarneq nunanit tamalaaneersunit 25-init peqataaffigineqarpoq ataatsimeersuarnerlu tunngavigalugu suliassaqarfimmi tamatumani ilisimatusarneq pillugu takussutissamik annertungaatsiartumik ilanngutassiortoqassaaq.
