SPI

Silap Pissusianik Ilisimatusarfimmi suliassat tassaapput silap pissusiata allanngornissaata issittup imartaanut, tatsinut nunamilu avatangiisinut inuiaqatigiinnullu kalaallinut sunniutissaasa misissuiviginissaat, tamatumunngalu atatillugu naleqqussarnissamut qanoq iliuusissat pinaveersaartitsinissamullu pilersaarusiornissamut aqqutissiueqataanissaq. Silap Pissusianut Ilisimatusarfik 2009-mi pilersinneqarpoq Kalaallit Nunaanni Ilisimatuutut Misissuinermut Kommissionip, Pinngortitaleriffiup, Ilisimatusarfiullu suleqatigiinnerisigut.

Silap Pissusianik Ilisimatusarfik Nuummi Pinngortitaleriffimmi inissisimavoq, ilisimatusarnermillu assigiinngitsutigut suliaqarnermi qallunaat nunaanni nunanilu allani universitetinik ilisimatusarfinnillu qanimut suleqateqarluni. Silap Pissusianik Ilisimatusarfik ilisimatusarluni sulianut ingerlatassanut atugassanik aningaasaliiffigineqarsimavoq, ilisimasatigut silap pissusianut, pinngortitamut, teknikkimut inuiaqatigiinnullu ilisimasat qaffassarnissaannut atugassarititaasunik.

Issittumi inissisimanermigut arlalitsigut pitsaaquteqarpoq. Siullertut ukioq kaajallallugu issittumi ilisimatusarnermik ingerlatsiviusinnaanermigut, tamatumanilu atortorissaarutitigut inissaqartinneqarnikkut assigisaatigullu sullissiviusinnaanermigut. Silap Pissusianik Ilisimatusarfik nunatsinniinnermigut inuiaqatigiinnut ilaalluinnarpoq, ingerlaavartumik, ilisimatusaatillu assigiinngisitaartut suleqatigiinnerisigut aammalu uuttortaanertigut misissuinerit aqqutigalugit siunertat ilagimmassuk inuiaqatigiit silap pissusiata allanngorneranut qanoq iliuusissamikkut piareersarsinnaanissaannut aqqutissiueqataanissaq.

Sulisorisatta avatangiisit pinnerluinnartut peqqarniissinnaasullu qeqqanni sulinertik aammalu Silap Pissuisianik Ilisimatusarfiup inuttut ataasiakkaatut kiffaanngissuseqarluni sulisinnaanermut periarfissaqartitsinera nersualaarinnissutigisarpaat, tamakkuummatami eqaatsumik sulinissamut nutaaliornissamullu periarfissiisut, pingaartumik uumassusileqatigiiaat ingerlaasaannut tunngasunik sulialinnut. Silap Pissusianik Ilisimatusarfimmi eqaatsumik nutaaliornermillu suleriaaseqarneq tassarpiaavoq sulisutta pikkorilluinnarnerannut aammalu suliaminnut soqutiginnilluinnarnerannut tunngaviusoq, tamannalu tunngavissiivoq Silap Pissusianik Ilisimatusarfiup silap pissusianik ilisimatusarnermi siuttuuneranut.