Silap Pissusianik Ilisimatusarfik

Siunertaq:

Silap Pissusianik Ilisimatusarfiup anguniarpaa nunat tamalaat akornanni silap pissuianut ilisimatusarnikkut siuttunngornissaq, silap pissusiata allanngorneratigut issittumi uumasoqatigiiaat inuiaqatigiillu sunnerneqarnerat pineqartillugit.

Siunertap anguniarnissaa:

Silap pissusiata allanngornerata Kalaallit Nunaannut sunniutai pillugit, pinngortitaq pillugu ilisimatusaatit, teknologi inuiaqatigiillu pillugit ilisimalikkat pineqartillugit, peqataatitsinikkut attaveqaqatigiinnikkullu aqqutissiuusseqataanissaq.

Tunaartarisat:

Tunaartarisat pingasunut avinneqarsinnaapput, tassaasunut:

Ilisimatusarneq:

Silap Pissusianik Ilisimatusarfiup pinngortitaq pillugu ilisimatusarneq, teknologi inuiaqatigiilerinerlu ilisimatusaatitut peqataatikkusuppaai, silap qangarsuummalli namminermini allanngorartuarnerata aammali silap pissusiata allanngoriartornerata issittumi uumasoqatigiiaanut inuiaqatigiinnullu sunniutai itinerusumik paasisaqarfiginiarlugit.

Silap Pissusianik Ilisimatusarfiup aaqqissuussaanik nunat tamalaat akornanni silap pissusiata allanngoriartorneranut ilisimatusartut ataatsimeersuartinneqartassapput oqallitsitsinertalinnik aalajangersimasumillu angusaqarniartitsilluni ataatsimiisitsisoqartassalluni. 

Tunngavik:

Silap Pissusianik Ilisimatusarfik nunatsinni nunat tamalaat akornannit peqataaffigineqartumik ilisimatusarnikkut periarfissaqalernissamut anguniakkami siuttuuniarpoq.

Silap Pissusianik Ilisimatusarfik tassaarusuppoq nunat tamalaat akornanneersunik tamakkiisumik proffessorinik, ilisimatusartunik ilinniartunillu inuttalersugaq, avatitsinni ilisimatusartunut ilinniartunullu allanut attaveqarluartunik.

Silap Pissusianik Ilisimatusarfiup suliassaraa ilisimatusarnikkut inernerit ilisimatusartunut allanut, naalakkersuinikkut sulialinnut inuiaqatigiinnullu apuussisarnissaq.

Sulisut:

Silap Pissusianik Ilisimatusarfiup anguniagaraa suliffitsialak aammalu avataaninngaanniik assigiinngisitaartunik ilisimatusaateqarnikkut siuttunik sulisoqarnissaq.

Silap Pissusianik Ilisimatusarfik inuusuttut ilinniaqqinnissaannut aqqutissiuusseqataarusuppoq.

Anguniakkat qanoq ilillugit anguneqassappat:

Anguniakkat angutserlugit iliuuseriniakkat sisamanut agguarneqarsimapput:

Ilisimatusarneq:

Silap Pissusianik Ilisimatusarfimmi nunat tamalaat akornanni ilisimatusarnikkut suleqatigiinneq tunngaviussaaq.

Silap Pissusianik Ilisimatusarfiup qanimut suleqatigissavai nakkutilliinikkutsuliaalereersimasut, ilisimatusarnermik sullissiviit ilisimatusarnikkullu suliat ingerlareersut.

Tunngavik:

Silap Pissusianik Ilisimatusarfik tassaassaaq nunat tamalaat akornanni suleqatigiiffik tuluit oqaasiinik attaveqaatiliusoq.

Silap Pissusianik Ilisimatusarfik ukiumoortumik suliat killiffiat pillugu saqqummiussisassooq.

Sullivik:

Silap Pissusianik Ilisimatusarfiup akisussaaffigissavaa laboratoriami ilisimatusarlunilu angalalluni sulinermi  isumannaallisaanikkut sulinermilu malittarisassat malinneqarnissaat.

Silap Pissusianik Ilisimatusarfimmi sulisut sungiussilluarsimasut piginissaat anguniarneqassaaq, taakkua pikkorissarnissamut pisariaqartitaannut periarfissiisarnikkut.

Silap Pissusianik Ilisimatusarfiup sulisoqarnikkut ingerlatsineq eqaatsumik aaqqissuunniarpaa, sulisut qaffasissumik piginnaanillit nutaanngorsartarnissaat aammali ingerlaannarsinnaanerannut periarfissat pioqqullugit.

Atugassarititat:

Silap Pissusianik Ilisimatusarfik Pinngortitaleriffimmut Ilisimatusarfimmullu attuumassuteqarusuppoq.

Silap Pissusianik Ilisimatusarfik allaffissornikkut pikkorilluinnartunik sulisulimmut attuumassuteqarusuppoq (attaveqatigiinnermut, angalanermut ineqarnermullu sullissisinnaasunik, naatsorsuuserinikkullu) eqaatsumik sullissisinnaasunik aammalu tapertaalluarnissamut aqqutissiuussisinnaasunik.

Aningaasaqarnikkut atugassarititat naalagaaffimmiit, ilisimatusarnermut aningaasaateqarfinniik, inuinnaat aningaasaateqarfiinit, suliffissuaatilinnit, nunatsinniittunit nunallu tamalaat akornanniittunit qulakkeerneqassapput.