Ilisimatusartartut taama siunnersuinerminnut tunngavilersuutigaat Nuup Sisimiullu eqqaanni saarulleeqqat aalisarneqalerumaartussat amerleriarsimanerat, saarulliit ukioqatigiiaat amerlanerulernerat kiisalu saarullittarineqartartut agguaqatigiissillugu 10 cm-inik siornamut sanilliullugu anginerulermanerat 44 cm-iniit 54 cm-inut takissuseqalersimallutik.

Sinerissap qanittuani saarulleqatigiiaanut tunngatillugu allannguutit taamaammata pisassiissutigineqarsinnaasunik qaffaaneq pivoq, naak saarulleqatigiiaat immikkoortut qanoq amerlatigisunik peqarnersut taamaalillunilu aalisarnerup taakkununnga qanoq sunniuteqartiginera naammaginartumik ilisimaqqissaarneqanngikkaluartoq.

Taamaakkaluartoq sinerissap qanittuanut innersuussuteqarneq pisinnaasimavoq, periuseq nutaaq suut tamaasa ilisimaqqissaanngikkaluarlugit naatsorsueriaaseq ilisimatusartartunit ineriartortinneqarsimasoq naapertorlugu.

ICES-ip, tassa nunarsuarmioqatigiit imaani misissuisarnerni siunnersuisoqatigiivisa, aammalu Pinngortitaleriffiup 2014-imut aalisagaqatigiiaat pillugit ilisimatuussutsikkut siunnersuineranni sinerissap qanittuani saarullinnut tunngassuteqartoq nutaarsiassaavoq malunnaateqarnerpaaq. Siunnersuineq tamakkiisoq nunatsinni Naalakkersuisunut ulluni kingullerni ingerlateqqammerneqarpoq.

Nunatsinneersut aalisartagaannut allanut tunngatillugu siunnersuineq allannguuteqanngilaq:

Nunatta avataani tamarmi saarullinnut tunngatillugu: Tamaani saarulliit suffeqqittalernissaat periarfissiissutiginiarlugu toqqaannaq

aalisarneqartariaqanngikkaluarput.Avataani qalerallit - Tunup, Islandip Savalimmiullu imartaanni: Siunnersuineq allannguuteqarnani pisassiissutigineqarsinnaapput 20.000 tonsit.

Suluppaagaq natermiu (S. mentella) Tunup imartaani imavimmut iteriannginnerani: Siunnersuineq allannguuteqarnani pisassiissutigineqarsinnaapput 3.500 tonsit.

Aalisagaqatigiiaat allat Kalaallit Nunaanut soqutiginaatillit:

Ammassaat - Tunup, Islandip Jan Mayenillu imartaanni: Tamaani ammassaat amerlassusiannut tunngatillugu paasissutissat nutaat pigitinnagit 2013/2014-imi aalisartoqartariaqanngikkaluarpoq. Ammassannut tunngatillugu inaarutaasumik siunnersuineq islandimiut misissuinerannit inernerit piareerneqarnissaannut utaqqimaarunneqarallarpoq. 2012/2013-imut 570.000 tonsit pisassiissutigineqarput.

Saarulliit, sejit kullerillu - Barentip imartaani:  Barentip imartaani saarulleqassuseq pitsanngoriaateqarujussuarsimavoq, kisiannili sejit kullerillu atugarliorput

Saarullinnut tunngatillugu siunnersuineq siornamut sanilliullugu 53.000 tonsinik qaffaaffigineqarpoq, taamaalilluni 2014-imut 993.000 tonsit pisassiissutigineqarsinnaasutut innersuussutigineqarlutik. Tamaani nunatsinneersut 2012-imi pisassiissutigineqartunit 8.500 tonsinik pisaqarput. 2014-imi kullerinik pisassiissutigineqarsinnaasutut 150.000 tonsit innersuussutigineqarput siorna ukiormannamut innersuussutigineqartut 238.000 tonsiullutik. 2014-imi sejit pisassiissutigineqarsinnaasut 140.000 tonsit innersuussutigineqarput. 2013-imut innersuussutit 164.000 tonsiupput. Nunatsinneersut 2012-imi sejinik 679 tonsinik pisaqarput.

Siunnersuinermut tunngassutillit uani nassaarisinnaavatit.

Itinerusumik paasisaqarusunnermi saaffigisassaq:

Immikkoortortami pisortaq Helle Siegstad oqarasuaat 361200 imal. mail: HeSi@remove-this.natur.gl

Pinngortitaleriffiup ilisimatusartunut angallataa R/V Sanna maajip qiteqqunnerani angallasseqqaarpoq. Taamani Nuup kangerluata qinngorpiaaniit, Sermitsiap qeqertai atuarlugit Fyllap ikkannersuata tungaanut misissugassatsinnik tigujoqqaavugut. Misissugassanik tigujoqqaasarnerit amerlanerssaat piffissaq aalajangersimasoq sumiiffillu aalajangersimasoq ukiumiit ukiumut uterfigisarlugit pisarpoq. Tassalu ileqqoq taanna atorlugu silap pissusiata allanngorneranut misissuutit aammalu uumasut inuiaqatigiinnut pingaarutillit assigiinngitsut nakkutigineqarput. Tassalu upernaaq Nuup kangerluani angalaneq tamakku ilagivaat. Ukiut tamaasa maajimi aqqut taanna atorlugu misissugassanik tigujoqqaasoqartarpoq. Misissuilluni suliaq taanna Greenland Ecosystem Monitoringimut (GEM) ilaavoq, tassaasoq assigiinngitsunik ilisimatusaatillit suleqatigiinnerisigut silap pissusiata allanngornerata kingunerisaanik imarmi nunamilu pinngortitami ataqatigiinnik misissuiffik, tassalu taassuma Nuummi immikkoortortaani (Nuuk Basis) immersuisuulluni. Tamatumani misissorneqartartut nalunaarsorneqartartullu tassaallutik immap kissassusia, tarajoqassusialu, CTD (asseq takujuk) atorlugu uuttuiffissat aalajangersimalluinnartut aqqusaarlugit, kangerluup qinnguani sermersuup aniaffianiit samunga Fyllap ikkanersuata tungaanut.

GEM-imut ukiut tamaasa nalunaarutigineqartartussat akornanniipputtaaq aalisagaaqqat, kinguppaaqat assagiaaqqallu.  Tamakku qassutit 0,5 mm-inik nigartallit, BONGO-nik taasagaat (Asseq 1) atorlugit pisarineqartarput, Qaqinnerini formalinimik imalimmut poorneqartarput, angerlaannissaannut asiunaveerlugit.

Ilisimatusarnermi angallat Sanna suliffigiuminarluinnartuuvoq ataatsikkullu ilisimatusartut qulit tikillugit angallassinnaallugit. Taamaakkamilu annertusisamik suliaqarnissamut periarfissiivoq, ukiormannalumi Aarhus Universitetermiut peqatigineqarput, Issittumi ilisimatusarnerit pillugit peqatigiinnermut (ASP-Arctic Science Partnership) atatillugu, paasiniaaffigalugit uumasoqatigiiaat tappiorannartut, bakteriat ammassaallu.

Pinngortitaleriffimmi katersat suliareqqinneqapallattarput, qaammallu qaangiutiinnartoq BONGO-mik tigusat, aalisagaaqqat, kinguppaaqqat saattuassaaqqallu Pinngortitaleriffiup teknikeriinit tamakkerlugit suliarineqareerput. Uuttuinerit CTD-mit pCO2-millu uuttuutinit qarasaasiamut nuunneqartarput ilisimatusartullu tamakku tunngavigalugit tulliani uuttortaanissap tungaanut sulisarput. (Asseq 4, Nuup kangerluani immap kissassusia, CTD-meersut malillugit).

Kristine Arendt

Københavnip Universitetianit Biologisk Institutimit biologitut qulequtserlugu ”Natsiit nerisartagaat” 1988-imi naammassissuteqareernermi kingorna Helle Siegstad nunatsinnut attuumassuteqartuinnarnik suliaqarpoq.

Suliami ilaatigut nunatsinni ilisimaneqarluartoq pinngortitap oqaluttuassartaanik ilisimasartooq H. C. Petersen peqatigalugu Helle Siegstad nunatsinni pisuussutit uumassusillit pinngortitamilu eriagisat pillugit paasissutissarpassuarnik katersueqataavoq nalunaarsueqataallunilu. Taamaalilluni uumasut ataasiakkaat pillugit paasissutissat, atugassarisaat, iluaqutigineqarnerat, amerlassusiisa nikerarnerannut kiisalu paasissutissat inuit uumassuseqassutsimut sunniutigisartagaannut tunngassuteqartut 1988-imiit 1990 tikillugu katersorneqarput. Paasissutissat nunatta inoqarfiinit tamangajannit katersorneqarput, taamaattumillu suliaq immini imaannaanngitsuuvoq.

Pinngortitaleriffiup suliassaqarfiisa qanga Grønlands Fiskeriundersøgelser-mit nunatsinnut nuunneqarnerisa peqatigisaanik Helle Siegstad Aalisakkanut Qalerualinnullu Immikkoortortaqarfimmi pisortanngortussatut toqqagaavoq. Taamanerniit Helle Siegstad nunarsuarmi tamarmi ilisimatuussutsikkut suliniaqatigiiffiit suleqatigalugit nunatsinni aalisakkat pillugit ilisimatuussutsikkut siunnersuinerpassuarni suleqataalerpoq.

”Suliumatoorsuuvutit suliassannut suleqatinnullu tunniusimalluinnartuullutit, suullu tamarmik ajornerpaaffianniikkaluaraangata nakkaannanngisaannarputit. Ilaatigut Immikkoortortaqarfinni sulisussaaleqillutit naalliuperaartaraluarlutit ilisimatuussutsikkut siunnersuinerit tamatigut piffissaq eqqorlugu tunniuttarpatit. Aammalu umiarsuit misissuutigisartakkatta ingerlanneqarneranni qitiulluinnarlutit pingaaruteqarputit”, Pinngortitaleriffimmi pisortaaneq Klaus Nygaard Helle Siegstadimut oqaaseqarnermini ilaatigut taama oqarpoq.

Qujanartumilli pilersaarusiornerit eqaatsumik ingerlasimapput. Atortussanik nassiussuineq, angalanissat aaqqissuunneqarnerat, najugaqarfissaqartinneqarnerit misissuivissanullu aaqqissuussinerit Canadami, Kalaallit Nunaanni Danmarkimilu inissisimasut ilisimatusartut, allaffissornikkut sulisut aammalu pilersaarusianut ataqatigiissaarisut akornanni suleqatigiilluarnikkut tamanna iluatsissimavoq. Qanoq iserianngitsoq tassa Nuummut aallarpugut, ilisimatusarnissatsinnut piareersarluarsimalluta (tassa taamak isumaqarluta). Tassami pissutsit piviusut paasinarsisippaat, Kalaallit Nunaanni sulinissamut tamakkiisumik siumut piareersartoqarsinnaanngitsoq!

Siullertut piviusunngortitsinissatsinnut akimmisaartitsisut annersaat tassaasimavoq Kangerluarsunnguup sikuunnginnera. Ullualunni sikumi saattuaqqami katersigaluarsinnarluta, ulloq ataaseq atorlugu allamik misissugassatsinnik katersiviusinnaasumik ujarlernitsigut Kanajorsuarni siku suliassatsinnut atorsinnaasoq nassaaraaput. Tamannali aamma unammillernalaanngitsoorsimanngilaq, tassami ilulissat aniasut aqqutaaniinnermigut tikikkuminaallisarlunilu pigami, allaat ualeq ataaseq kiggugussaasimalluta aalariarfeerulluta, aammalu silap kiattuarsinnarnerata immap sikuata qanoq issusianut naatsorsuisinnaanerput akornusersorpaa, eqqoriaaginnartariaqartarsimalluta.  Tamakku atugassarisimagaluarlugit, Silallu

Pissusianik Ilisimatusarfimmiut pissutsinik misilittagaqarluartut iluaqutsiullugit, anguniakkatsinnik tamangajannik angusaqarsimanerput oqaatigisariaqarpoq. Nuuk, eqqaalu nuannersumik paasisaqarfigalugulu angalaarfigisinnaasimavarput.

Immap sikuanik misissuinermi peqataasut tassaallutik: Brent Else, Karley Campbell, Odile Crabeck, Ryan Galley, Alex Hare, Marcos Lemes, Fei Wang, and Nicolas-Xavier Geilfus, Centre for Earth Observation Science (CEOS) (Nunarsuarmi pissutsinut misissuinermut Ilisimatusarfik) University of Manitobmeersut, Jody Deming Shelley Carpenterilu University of Washingtonimeersut; Heidi Sørensen, Kalaallit Nunaanni Silap Pissuisanik Ilisimatusarfimmeersoq aammalu CEOS, Kalaallit Nunaanni Silap Pissusianik Ilisimatusarfik aammalu Arctic Research Centre,  Aarhus Universitetimiittoq sinnerlugit, Søren Rysgaard. Carl Isaksen Ivali Lennertilu suliami atortutigut ataqatigiissaarisuupput suliallu iluatsittumik ingerlaneranut  peqqutaanerpaanut ilaallutik.  Ilisimatusarluni misissuinermi sammisat assigiinngitsorpassuusimapput, ilaatigut makku sammineqarsimallutik; immap sikuata sunik katitigaaneranut uumasoqassusianullu tunngasut, immap sikuata silaannarmik kissatsitsisartunik gassinik aqqusaarneqartarneranut tunngasut, aammalu immap sikullu akornanni ataqatigiissutinut tunngasut. Suliaq ingerlanneqarpoq Kanajorsuarni, marsip aallartilaarneraniit apriilip qiteqqunnissaata tungaanut.

Brent Else

Winnipeg, MB

Jun. 4, 2013

Ukiormanna februaarip qiteqqunneraniit immap sikuanik misissuinissaq aallarnerneqarpoq, Nunatsinni Silap Pissusianik Ilisimatusarfimmiit, Aarhus Universitet, University of Manitoba, University of Washingtonilu suleqatigalugit. Ajoraluartumilli silap ajoqattaarnera aammalu immap sikusimannginnerata  Kangerluarsunnguami suliap ingerlanniarneqarneralua qatangiinnartippaa. Qujanartumilli Kanajorsuit sikuunerata suliassap nanginneqarnissaa “annaappaa”, taamaasillunilu marsip allaartinneraniit apriilip qiteqqunnissaata tungaanut misissugassanik sapaatip akunneranut marluk pingasoriarluni  tigooqqaanissamut periarfissiisimalluni.

Periutsit assigiinngitsut atorlugit sikumi gassit pissusiat uuttorniarlugu suleriaaseqartoqarsimavoq, taakkununnga ilanngullugit tappiorannartut bakteriallu pileriartortarnerisa uuttortarneqarnerat. Uuttortakkat allat tassaallutik gassit silaannarmut kissakkiartuutaasartut annertussutsimikkut allanngoriartortarnerat, immap seernassusianut uuttuutinik (pH) tigujoqqaaneq, Ikaitip annertussusianik uuttuutit, tappiorannartunik tigujoqqaaneq, bakteriat cholinimik (taratsut ilaat) tigujoqqaanerat, uuttortaatillu immikkuullarilluinnartunik uuttuisinnaasut atorlugit sumiiffinni aalajangersimasuni suut nikerarnerannik uuttortaanerit kiisalu silaannaat ipinartut ingerlaarnerisa qanoq issusilersorniarnerini naatsorsuisinnaalernissamut atugassanik uuttortaanerit. 

Silap Pissusianik Ilisimatusarfimmeersoq Heidi Louise Sørenseni suliamut peqataasimavoq, soqutigisaanullu ilaavoq silaannaap ipinartup immap sikuani pissusianut ingerlaartarneranullu tunngasut. ”Silaannaat ipinartut immap sikuatalu imminnut qanoq attaveqarnerat paasiniassallugu soqutigisama annersaraat (nitrifikation, denitrifikation aamma anammox). Pissutsit immap sikuata silaannarnik ipinartunik ”tigujoqqaasinnaassusianut” pitsaanerpaajusarput sikuerukkiartornerata nalaani, tassa upernaakkut sikup aakkiartulernerani (taratsut inuussutissartallit assigiinngitsut akuunerini). Siusinnerusukkut uuttortaanerit ataasiaannarluni tigujoqqaanikkut ingerlanneqartarsimapput, taamaammallu qulakkeerlugu ilisimaneqarani immap sikuata silaannarnik ipinartunik tigujoqqaasarnerata ingerlarnga aammalu ukiup ingerlanerani allanngoriartortarnera oqaatigiuminaalluni. Tamatuma itinerusumik paasinissaanut iluaqutaasinnaasorivara piffissaq sivisunerusoq atorlugu immap sikuata silaannarnik ipinartunik tigujoqqaaneranik ingerlatitseqqiisarneranillu uuttortaasarnikkut.

Siunissami silap pissusiata allanngoriartorneranut sunniuteqaqataasussanut takorloorneqartut ilagaat, silaannarmut kissakkiartuutaasartoq gassi, N₂O. Gassi taanna nitrogenip bakterissanit nungusarneqarnerani pinngortarpoq, immallu sikuani tamanna pisinnaasarmat silaannaat ipinartut ingerlaassiannik paasiniaanissaq pisariaqarluinnarpoq. Silaannaat ipinartut piffissap ingerlanerani ingerlaasiat pillugu misissuinigut nanginniarlugit ukiup tullissaanut piareersarnivut aallartereerput, neriuutigivarpullu.

• Distribution of small Greenland halibut in Baffin Bay
  
• Distribution of the commercial fishery for Greenland halibut and Northern shrimp in Baffin Bay

Nalunaarutit tuluttuinnaq allagaapput.

Teknikkikkut nalunaarutit allat atuakkit.

Maani Pinngortitaleriffimmi biologi tupaallangaarami issiavimminiit uppiinnangajappoq paasilerlugu timmiaq ilumut albatrossiusoq. Takoranneq, albatrosseq qernertunik qallulik. ”Kakkaassuaq. Takorannersuaq,” biologi alla timmialerisoq DCE-miittoq assinik nassitsikkami tupaallassimanermik mailimi akivoq.

Peqatigiit  immikkuullarissut
Inuit nunatta imartaani albatrossimik uumasumik takunnissimasut ikittuinnaapput, taamaalillutillu Jens Ostermann Hans Mølgård-ilu immikkuullarissumik takunissimasunut peqatigiinnut ilannguttutut oqaatigineqarsinnaalerput. Tassami albatrossit nunatsinni takuneqarsimasut nalunaarsorneqarsimasullu taamaallaat tallimaapput. Kingullermik nunatsinni albatrossimik sungaartumik siggulimmik takunnissimasumik nalunaarutiginnittoqarpoq ukiut 50-it matuma siorna. Tassa taama ittut marluk takuneqarsimasutut nalunaarsuutigineqarput, taakkulu august 1944 aamma august 1963 nalunaarutigineqarsimapput. Taakku albatrossinit qernertunik qallulinnit allaanerupput. Qernertunik qallulillit allat marluk takuneqarsimasutut nalunaarutigineqarsimapput august 1935 aamma juli 1958.

Albatrossit siusinnerusukkut takuneqarsimasut tamarmik pisarineqarsimapput, tassami marluk Thorshavn-imi katersugaasivimmiippput, ataaseq sungaartumik siggulik Københvan-imi Zoologisk Museum-imiilluni ataaserlu assinga namminerisamik pigineqartuulluni.

Albatrossit nalinginnaasumik nunarsuup kujasinnerusortaani uumasuupput, piaqqisarfiisalu ilaat nunatsinniit qaninnerumiittut tassaapput Falklandip qeqertai aammalu Georgiep kujasinnerusortaa.

Timmissat pillugit nalunaarut 2009-meersoq naapertorlugu timmissat tamarmik eqqissisimatitaapput, taamaallaallu timmissat assigiinngitsut 20-t nalunaarummi allattorsimasut nunatsinni nalinginnaasumik piniarneqartartut piniaqqusaallutik.

Timmissat pillugit nalunaarut uani takuuk:

Inatsisiliorneq

Innuttaasunik ataatsimiititsinerni ilaatigut sammineqassapput piniarsinnaanermik allagartalersuisarnerit, piniarnernit nalunaarsuisarnerit kiisalu appat timmissallu mianerineqarnissaat anguniarlugu immikkoortut.

Innuttaasunik ataatsimiititsinissanut peqataatitaqarnissamik Pinngortitaleriffimmeersut aalajangerput pingaartumik nunatsinni appanut tunngassutillit pillugit. Tassami paasissutissat kingulliit takutippaat Kalaallit Nunaanni appat ineqarfiini amerlanerpaani appat aarlerinartumik ikiliartortut. Ineqarfiit angisuut Qaanaap eqqaaniittut kisiartaallutik ukiuni kingullerni qulini ikiliartorfiusimanngillat.

Kalaallit Nunaanni appanut tunngatillugu killiffissiuinermi nutaarsiassaq kingulleq tassaavoq Qeqertarsuup Tunuaniittoq appat ineqarfiat taaguuteqartoq Innaq appaarutivinnissaminut aarlerinartorsiorfiusorujussuusoq.

Aamma Upernaviup eqqaa ajornartorsiorfiuvoq. Appat ineqarfii Upernaviup kujataatungaaniittut ukiut qulikkaat arlallit ikiliartorfiorujussuareerlutik suli mianernartorsiorput. Kiisalu Kalaallit Nunaanni appat ineqarfiisa annersaat ilaat, Upernaviup avannaaniittoq Apparsuit, kingullermik appanik kisitsisoqarnerani malunnaateqartumik ikileriarfiusimasoq paasineqarpoq.

Taamaattumik appat pillugit peqqissaarussamik paasissutissiilluarnissaq aammalu qanoq iliornikkut appat ikiliartorunnaarsinneqarsinnaanerat anguneqarsinnaanersoq oqallisigissallugu pingaaruteqartorujussuuvoq.

Innuttaasunik ataatsimiititsineq (PDF)

Taamaapput aamma umimmanniartoqarnissaanut tunngatillugu innersuussutit, sumiiffik Kangerlussuaq-Sisimiut eqqaassanngikkaanni. Tamaani ukiuunerani januar/februar-imi umimmanniartoqartarnerata ingerlatiinnarneqarsinnaanera biologinit innersuussutigineqarpoq. Tuttunniarnerit umimmanniartarnerillu pillugit siunnersuinerit inuussutissarsiutigalugu piniartunut aammalu sunngiffimmi pinialuttartunut assigiimmik atuutsinneqarsinnaanerat siunnersuutigineqarpoq.

Ukiuunerani piniartitsisarnerit ukiut qulit missaat qaangiupput atuutitinneqalermata, taamanimi pingaartumik aqutsiveqarfinni Qeqertarsuup Tunua Ivittuullu akornanni tuttut amerlavallaarujussualersimammata. Maanna tuttut amerlassutsimikkut ima ikileriarsimatigipput nerisassaqassusiat eqqarsaatigalugu amerlassusiat ajunnginnerusumik attanneqarsinnaalersimalluni.

Taamaattorli siuliani innersuussutigineqartut pissutsit ilaannut atuutitinneqaqqissaartariaqanngillat, innersuussutimmi tammajuitsussarsiniarluni piniartitsisarnerni atuutitinneqarnissaat pisariaqartutut isigineqanngilaq. Biologit naliliipput tammajuitsussarsiniarluni piniartitsisarnerni uumasunik akornusersuisarneq ima annikitsigisoq taama ingerlataqartoqaannartarnissaa ajorunnarnani.

Taamatut aamma ukiuunerani piniartitsisoqartariaqannginneranik innersuussut Qaanaap avannaatungaaniittunut, Inuarfissuarmi (Inglefield Land)/Prudhoe Land Kangerluarsummilu (Olrik Fjord) taavani piniartut peqatigalugit ukiuunerani tuttunniartitsisarneq naliliiffigineqarsinnaavoq, soorlu aamma piffissat piniarfiusut allanngortinneqarsinnaanerat nalilersorneqarsinnaasoq. Aamma Inuarfissuarmi, Kap Atholl-imi, Jameson Land-imi, Scoresbysundip kangerlussuata qinngorpasissortaani kiisalu Ivittuuni ukiuunerani umimmanniartitsisarneq piniartullu taama naliliiffigineqarsinnaasoq innersuussutigineqarpoq.

Innersuussutit qulaani pineqartut saniatigut biologit pisarnertut ima siunnersuipput: tuttut umimmaallu arnavissat angutivissallu amerlaqatigiit pisarisarsigit aammalu eqqaamallugu piniarnermit nalunaarsuutit immersortarnissaat. Aqutsiveqarfinni assigiinngitsuni tuttoqassutsip umimmaqassutsillu piviusorsiornerpaamik biologinit naliliiffiginiarneqartarnerini piniarnermit nalunaarsuutit pingaarutilerujussuarmik tapertaasarput.

2013-imi 2014-imilu tuttunniarnissat umimmanniarnissallu pillugit Pinngortitaleriffimmit siunnersuinerit nalilersoqqinneqarnissaannik Aalisarnermut, Piniarnermut Nunalerinermullu Naalakkersuisoqarfik piumasaqaateqartuuvoq. Naalakkersuisut taakkuupput tuttutassiissutissanik umimmattassiissutissanillu aalajangersaasartut Aalisarnermut, Piniarnermut Nunalerinermullu Naalakkersuisoqarfiup innersuussuteqarnera tunngavigalugu.

Itinerusumik paasisaqarusunnermi saaffigisassaq: Ilisimatusartoq Christine Cuyler oqarasuaat 361200